Ձեր վստահելի աղբյուրը

Բարձրագույն դատական խորհրդի անդամ Նախշուն Տավարացյանի լիազորությունների դադարեցման պահանջով ԲԴԽ  նիստում ԲԴԽ անդամ Գրիգոր Բեքմեզյանը միջնորդեց որպես վկա հրավիրել Վճռաբեկ դատարանի նախագահ, հուլիսի 11–ին կայացած Դատավորների ընդհանուր ժողովի նախագահ Երվանդ Խունդկարյանին։ Նա նշեց, որ որ Ե. Խունդկարյանը  պետք է ներկայանա ու պարզաբանի՝ ե՞րբ է,  ըստ Դատավորների ընդհանուր ժողովի, Նախշուն Տավարացյանը համարվում ընտրված և պաշտոնը ստանձնած ԲԴԽ անդամ։

ԲԴԽ անդամ, դատավոր Մեսրոպ Մակյանն ասաց, որ ժողովը  հավաքական մարմին է, չի բացառվում, որ ժողովի 80 տոկոսի կարծիքը Երվանդ Խունդկարյանի կարծիքի հետ չհամընկնի։

«Երվանդ Խունդկարյանն իր ելույթում ասել է, որ Նախշուն Տավարացյանը համարվում է  պաշտոնը ստանձնած ընտրվելու պահից՝ 2018 թ. նոյեմբերի 8-ից, իսկ Նախշուն Տավարացյանն ասաց, որ պաշտոնը ստանձնել է երդվելու պահից՝ հուլիսի 11-ին։ Քանի որ տիկին Տավարացյանն այստեղ է գործուղղվել Դատավորների ընդհանուր ժողովի կողմից, պետք է իմանանք ժողովի կարծիքը, որը մեզ ասելու, հիմնավորելու իրավունք ունի պարոն Խունդկարյանը»,- ասաց Գրիգոր Բեքմեզյանը։

Քվեարկությամբ՝ ձայների 4 կողմ, 5 դեմ հարաբերակցությամբ մերժվեց միջնորդությունը։ 

Այնուհետև միջնորդությամբ հանդես եկավ ԲԴԽ անդամ Հայկ Հովհաննիսյանը։ Մասնավորապես նա նշեց. «2018 թ. նոյեմբերի 8-ին դատավորների ընդհանուր ժողովի ընթացքում իրենց թեկնածությունն են առաջադրել Վճռաբել դատարանի քաղաքացիական և վարչական պալատի դատավորեր Սուրեն Անտոնյանը և Ստեփան Միքայելանը։

Ինչպես փաստեց տիկին Տավարացյանը, այդ ժողովի ժամանակ ստեղծվել էր այնպիսի անհաշտ մթնոլորտ, իրեն ստիպել է հրաժարվել երդվելուց։ Դրանից հետո տվյալ ժողովի  արձանագրությամբ  ասված է, որ պարոնայք Անտոնյանն ու Միքայելյանն ունեցել են մի շարք ելույթներ, իրենց անհամաձայնությունն են հայտնել այս գործընթացի հետ, որից հետ դեկտեմբերի 21-ին կայացած Դատավորների ընդհանուր ժողովում, որի օրակարգային հարցերից է եղել նաև ԲԴԽ  նոր անդամ ընտրելու հարցը, մասնավորապես նրանք բազում կարծիքներ են հնչեցրել ընտրությունների օրինականության, իրավազորության, նոր ընտրություններ կազմակերպելու առումով, վերահաստատել են իրենց կամքը մասնակցելու այս ընտրություններին։ Այնուհետև դրանից հետո, իմ տվյալներով, հուլիսի 11-ին կայացած ընտրությանը պարոն Անտոնյանն ժողովին ընդհանրապես չի մասնակցել, իսկ  Միքայելյանն արձակուրդում է  գտնվել, չի եկել ու չի պնդել իր թեկնածությունը։ Հաշվի առնելով Ընդհանուր ժողովի դռնփակ լինելու բնույթը,  ԲԴԽ անդամի ընտրության և նրա լեգիտութան բարձր աստիճանը, հարցեր ունեմ պարոնայք Անտոնյանին, թե ինչու հրաժարվեց հանել իր թեկնածությունը, և  Միքայելյանին, որը չմասնակցեց։

Այս հարցերը պարզելու  և գուցե դրանց առնչությամբ տիկին Տավարացյանի  ընտրության լեգիտիմությունը  պարզելու համար միջնորդում եմ որպես վկա հրավիրել և հարցաքննել դատավորներ Սուրեն Անտոնյանին և Ստեփան Միքայելյանին։Մենք գտնում ենք, որ շատ կարևոր է, որ գան այս դատավորները, ու մենք լսենք, թե ինչ է եղել, կարող է իրենց էլ են սպառնացել, համոզել, թող գան, ելութ ունենան, տեսնենք՝ ինչ է կատարվում»։

Նախշուն Տավարացյանը դեմ չէր այս միջնորդությանը։ Միջնորդությունն ընդունվեց ձայների 5 կողմ, 4 դեմ հարաբերակցությամբ։  Նիստը հետաձգվեց։

Հիշեցնենք, որ Վճռաբեկ դատարանի դատավոր Նախշուն Տավարացյանն  ինն ամիս առաջ էր ընտրվել ԲԴխ անդամ, բայց դիմում էր գրել ու հրաժարվել ԲԴԽ անդամ դառնալուց։ Սակայն հուլիսի 11-ին կայացած Դատավորների ընդհանուր ժողովում նա երդում էր տվել՝ այդպիսով դառնալով ԲԴԽ անդամ։  Այսօրվա նիստը հրավիրել են ԲԴԽ անդամներ  Գրիգոր Բեքմեզյանը, Հայկ Հովհաննիսյանը և Լիպարիտ Մելիքջանյանը, որի  օրակարգում հենց Նախշուն Տավարացյանի լիազորությունների դադարեցման հարցն է։ Նրանք գտնում են, որ Ն . Տավարացյանը ԲԴԽ լիազորությունները ստանձնել է դեռ 2018 թ. նոյեմբերի 8-ին, սակայն մինչ օրս որևէ նիստի չի մասնակցել որպես ընտրված անդամ, չի ներկայացրել որևէ հարգալից պատճառ, իր մասնակցությունը բացառող որևէ հանգամանք, նրա լիազորությունները պետք է դադարեցվեն։ «Օրենքի պահանջն է, քանի որ նման անդամը ԲԴԽ-ում չի կարող գործել, նման գործելաոճը խախտում է ԲԴԽ նիստերի կազմակերպման ու  անցկացման իրավական հիմքերը»,- նիստի ընթացքում ասել է Գրիգոր Բեքմեզյանը։ Մինչդեռ Ն. Տավարացյանը համոզմունք հայտնեց, որ ԲԴԽ անդամը ստանձնում է իր պարտականությունը երդում տալու պահից, կոնկրետ իր դեպքում՝ հուլիսի 11-ին։

Հիշեցնենք, որ Բարձրագույն դատական խորհուրդը կազմված է 10 անդամից: Բարձրագույն դատական խորհրդի հինգ անդամներին ընտրում է Դատավորների ընդհանուր ժողովը՝ դատավորի առնվազն տասը տարվա փորձառություն ունեցող դատավորների կազմից: Մյուս անդամներին ընտրում է ԱԺ-ն՝  փորձառությամբ իրավաբան գիտնականների և այլ հեղինակավոր իրավաբանների թվից։ Այսօր մեկ անդամի տեղ թափուր է։