Ձեր վստահելի աղբյուրը

Բարձրագույն դատական խորհուրդը հրավիրել է նիստ,  օրակարգում է ԲԴԽ անդամ Նախշուն Տավարացյանի լիազորությունների դադարեցման հարցը։ Նիստը հրավիրել են  ԲԴԽ անդամներ Գրիգոր Բեքմեզյանը,  Հայկ Հովհաննիսյանը և Լիպարիտ Մելիքջանյանը։

Հիշեցնենք, որ Վճռաբեկ դատարանի դատավոր Նախշուն Տավարացյանն  ինն ամիս առաջ էր ընտրվել ԲԴխ անդամ, սակայն դիմում էր գրել ու հրաժարվել ԲԴԽ անդամ դառնալուց, սակայն հուլիսի 11-ին կայացած Դատավորների ընդհանուր ժողովում նա երդում էր տվել՝ այդպիսով դառնալով ԲԴԽ անդամ։

Նիստի ընթացքում Ն. Տավարացյանն ասաց, քանի որ հարցը պայմանավորված է իր անձով, հետևաբար խնդրում է նիստն անցկացնել դռնփակ։

ԲԴԽ անդամ Գրիգոր Բեքմեզյանին ասաց, որ Ն. Տավարացայանի հարցն այստեղ որպես դատավոր չի քննարվում, այլ որպես ԲԴԽ անդամ։ 

«Որպեսզի մենք նիստը դռնբացից փոխենք  դռնփակ, պետք է լինի հետևյալ հիքմերից որևէ մեկը՝ վարույթի մասնակիցների մասնավոր կյանքի, արդարադատության շահերի, պետական անվտանգության, բարոյական պաշտպանության խնդիր։ Այս հիմքերից որևէ մեկը կա՞»,- հարցադրում արեց ԲԴԽ անդամը։ 

ԲԴԽ անդամ Մեսրոպ Մակյանն ասաց, որ  Գ. Բեքմազյանը մեջբերեց  «Դատական օրենսգիրք» սահմանադրական օրենքի դրույթները՝ կապված դատավորին կարգապահական պատասխանատվության ենթարկելու առնչությամբ քննվող գործերի նիստերը դռնփակ անցկացնելու իրավունքի վերաբերյալ։

«Կարծում եմ և համոզված եմ, որ ԲԴԽ անդամը, ընդ որում դատավոր անդամը, որևէ կերպ չի կարող ավելի քիչ իրավունքներ ունենալ այս առումով, քան այն դատավորը, որի նկատմամբ իրականացվում է կարգապահական վարույթ»,- ասաց նա։ 

ԲԴԽ անդամ Հայկ Հովհաննիսյանն ասաց, որ հենց արդարադատության շահը պահանջում է, որ այս նիստը դռնբաց ընթանա. «Վստահ եմ, որ մեր հարգելի գործընկերը դեմ չէ, որ արդարադատության շահից ելնելով այս նիստը դռնբաց ընթանա»։

ԲԴԽ անդամների կարծիքն այս հարցի շուրջ տարբեր էր, ուստի խորհրդը քննարկման համար գնաց խորհրդակցության սենյակ։

Խորհրդակցական սենյակից վերադառնալով՝ հայտարարվեց, որ նիստն անցկացվում է դռնբաց։