Ձեր վստահելի աղբյուրը

Կառավարության հերթական նիստը վարչապետ Նիկոլ Փաշինյանը սկսեց Իջևանի դեպքերին անդրադառանալով, այնտեղ տեղի ունեցած դեպքերը որակեց անթույլատրելի։

«Ապօրինի ծառահատումներով զբաղվող անձինք փորձել են ապօրինի պայմաններ պարտադրել կառավարությանը։ Միանգամից ասեմ, որ կառավարությանն ապօրինի պայմաններ պարտադրելու որևէ փորձ արժանանալու է ամենակոշտ հակազդեցության»,-ասաց Փաշինյանը։

Նա նկարագրեց այսպես, ապօրինի ծառահատումներով զբաղվող քաղաքացիների կողմից կազմակերպված ակցիայի մասնակիցները չեն ենթարկվել ոստիկանության օրինական պահանջներին, մարմնական վնասվածքներ են հասցրել ոստիկաններին։ 12 ոստիկան ստացել է մարմնական վնասվածք, բարեբախտաբար ոչ շատ ծանր։ Երկու քաղաքացի է ստացել մանրամնական վնասվածք։

Իջևանից քիչ առաջ վերադարձած ու նիստին մասնակցող փոխոստիկանապետ Վարդան Մովսիսյանին հանձնարարեց զեկուցել, թե ինչ է եղել ու ինչ վիճակ է հիմա։

Վերջինն ասաց, տուժած ոստիկաններից 8-ը ոստիկանության հոսպիտալում են, վիճակը բավարար է, երկուսը կմնան, վեցը դուրս կգրվեն՝ մնալով ամբուլատոր վերահսկողության ներքո։

«Ոստիկանության զորքերից մի մասը տեղափոխվել է Իջևան։ Այս պահին ոստիկնաապետն էլ այնտեղ է»,-ասաց Մովսիսյանը։

Նրա խոսքով, 19 հոգի բերման է ենթարկվել, որոնցից 13-ը ձերբակալված են։

«Բայց ես գիտեմ, որ պոտենցիալ բերման ենթարկվողների ցանկն ավելի լայն էր։ Պետք էր 36 հոգի՝ կազմակերպիչները պետք է բերման ենթրակվեin, մյուսներն  ո՞ւրն են»,-ասաց Փաշինյանը։

Փոխոստիկնաապետն ասաց, որ ցուցակը ձեռքներին ոստիկանները մեկնել են նրանց բնակության վայրեր, տեղում չեն եղել։

Փաշինյանը հետաքրքրվեց նրանց կողմից Հայաստանի տարածքը լքելու հնարավորության մասին, Մովսիսյանն արձագանքեց՝ բացառել են նման հնարավորությունը։

«Հիմա էլ միջոցառումներ են իրականացվում նրանց հայտնաբերելու ուղղությամբ»,-ասաց նա։