Ձեր վստահելի աղբյուրը

Հուլիսի 11-ին Բարձրագույն դատական խորհրդի անդամի պաշտոնը ստանձնելու համար երդում տված Վճռաբեկ դատարանի դատավոր Նախշուն Տավարացյանը համոզված է, որ ինքը պարտականությունները ստանձնել է հենց երդումից հետո։

«Իմ համոզմամբ, Բարձրագույն դատական խորհրդի այն անդամը, որն օրենքով  սահմանված կարգով և պայմաններով պաշտոնը չի ստանձնել երդմամբ, երբևէ չի կարող պատասխանատվության կանչվել երդմամբ սահմանված պարտականությունների չկատարման կամ ոչ պատշաճ կատարման համար, ինչը  հանգեցնում է այս առումով օրենսդրի սահմանած ամբողջ  գաղափարախոսության խեղաթյուրմանը»,- ԲԴԽ նիստում հայտարարեց Ն. Տավարացյանը։

Հիշեցնենք, որ Վճռաբեկ դատարանի դատավոր Նախշուն Տավարացյանն  ինն ամիս առաջ էր ընտրվել ԲԴխ անդամ, բայց դիմում էր գրել ու հրաժարվել ԲԴԽ անդամ դառնալուց։ Սակայն հուլիսի 11-ին կայացած Դատավորների ընդհանուր ժողովում նա երդում էր տվել՝ այդպիսով դառնալով ԲԴԽ անդամ։  Այսօրվա նիստը հրավիրել են ԲԴԽ անդամներ  Գրիգոր Բեքմեզյանը, Հայկ Հովհաննիսյանը և Լիպարիտ Մելիքջանյանը, որի  օրակարգում հենց Նախշուն Տավարացյանի լիազորությունների դադարեցման հարցն է։

Ն. Տավարացյանը, հղում անելով օրենքի համապատասխան հոդվածին, որի համաձայն ԲԴԽ նորընտիր անդամն իր պաշտոնը ստանձնում է ԲԴԽ համապատասխան անդամի պաշտոնավարման ժամկետի ավարտի օրվանից, այլ հիմքով ԲԴԽ անդամի թափուր տեղ առաջանալու դեպքում ընտրվելու օրվանից, ապա հարկ է նկատել, որ տվյալ դեպքում «ընտրվելու օրվանից եզրույթը» պետք է մեկնաբանել ոչ թե առանձին վերացված ընտրության արդյունքների հրապարակման պահից, այլ խորհրդի օրինական անդամ ունենալու օրենքով սահմանված  ողջ գործընթացի  ավարտման պահից։

«Ինձ չեմ համարում 2018 թվականի նոյեմբերի 8-ից խորհրդի անդամի պաշտոնը ստանձնած, քանի որ խորհրդի օրինական անդամ հանդիսանալու օրենքով սահմանված գործընթացի վերջին փուլը՝ երդման պաշտոնը, ստանձնելը չի կատարվել։ Ես համարվում եմ խորհրդի անդամի պաշտոնը ստանձնած իմ երդման օրվանից՝ հուլիսի 11-ից»,- ասաց նա։

Այնուհետև դիմելով ԲԴԽ անդամ Գրիգոր Բեքմեզյանին, որն ասել էր, որ Ն. Տավարացյանը ԲԴԽ լիազորությունները ստանձնել է դեռ 2018 թ. նոյեմբերի 8-ին, սակայն մինչ օրս որևէ նիստի չի մասնակցել, Ն. Տավարացյանն ասաց. «Պարոն Բեքմեզյանը շատ բարձր ձայնով հնչեցրեց, որ անգործություն եմ թույլ տվել, անհարգելի պատճառներով չեմ ներկայացել։ Ուրեմն ձեզ հիշեցնեմ, եթե ես պաշտոնը ստանձնած ԲԴԽ անդամ եմ համարվում, ուրեմն պետք է որոշ արտոնություններ կիրառվեին իմ նկատմամբ։  2018թ. նոյեմբերի 8–ից մինչ այսօր պետք է ինձ մակագրվող գործերը լիներ ընդամենը 25 տոկոսը, իսկ  ես աշխատում եմ չափազանց ծանրաբեռնվածությամբ՝ 100 տոկոս մակագրությամբ։
Ես Դատական դեպարտամենտից ընդամենը երկու ծանուցում է ստացել ԲԴԽ նիստերի վերաբերյալ՝ մեկը  հուլիսի 15–ի նիստի օրակարգի, մեկն էլ այսօրվա նիստի վերաբերյալ, իսկ մինչ այդ որևէ ծանուցում չի ստացել։

Հիմա դուք պատասխանեք պարոն Բեքմեզյան, ԲԴԽ–ն է անգործություն թույլ տվե՞լ, թե՞ ես։
Իրավաբան գիտնականներին պարզապես հորդորում եմ՝ ոչ թե վերցնել բարոյական կողմը, թե ինչպես կարող էր Նախշուն Տավարացյանը 9 ամիս հետո երդվեր և գար, բա ի՞նչ աներ Նախշուն Տավարացյանը, հետաքրքիր է, նախ տեղն ազատ է, դա Վճռաբեկ դատարանի տեղն է, երկրորդն էլ, եթե Դատավորների ընդհանուր ժողով չի եղել, Նախշուն Տավարացյանը որտե՞ղ գնար երդվեր, պատերի տակ երդվեի՞, ըստ ձեր ասածի՝ էդ ա։

Որպես իրավաբան գիտնականներ ավելի մեծ անելիք ունեք, եթե տեսաք այս հարցի հետ կապված կազուսային իրավիճակ առաջացավ Դատական օրենսգրքում։ Որպես իրավաբան գիտնականի ձեռնամուխ եղեք այդ իրավիճակը շտկել, ոչ թե Նաշխուն Տավարցյանին դարձրել եք հանրահայտ քննարկման թեմա։ Դուք մի մոռացեք, որ ես երեկ չէ առաջին օրը չեմ դատավոր դարձել, հազարավոր մարդիկ են ինձ գովեստի խոսքեր ուղարկել, հազարավոր մարդիկ ինձ գրավոր շնորհակալություն են հայտնել։ Ես էլ ունեմ շրջապատ, ընկերներ, հարազատներ, ամեն մեկը տարբեր ձևով է ընկալում և ձեր ամեն մի հայտարարությունից հետո հեռախոսիս զանգերի մեջ տեղ չի լինում։ Սա դատավորի արժանապատվության հետ կապված հարց է, սա դատավորի բարի համբավն արատավորող հարց է։ Հիմա  ես դատական հայց ներկայացնե՞մ ձեր դեմ  անօրինական հիմքերով իմ բարի համբավն արատավորելու համար։

Ձեր հրավերի ու ելույթի մեջ ի՞նչ իրավական կողմ կար, ամբողջը բարոյական կողմին էր նվիրված, թե 9  ամիս հետո ինչու, ինչպես  երդվեց։ Ինչու՞, խոստում տված մարդ կար, որ պետք է իմ տեղը ընտրվեր, պարզապես խոստումը մինչև վերջ չկատարվեց, ինչ-որ տեղից ուղղորդվո՞ւմ եք։ Հուլիսի 11–ի ժողովում 4-5 դատավորներ աղմուկ բարձրացրեցին՝ խախտելով էթիկայի և վարքագծի կանոնները, մեկը Սիմիզար Հովսեփյանը, որի տղան ձեր գիտնական իրավաբաններից է։ Իմ ազգանունը երբեք շահարկման առիթ չի դարձել, և այդ հայտնի «իրավաբանները» թող օրենսդրության կազուսը վերացնելու մասին մտածեն, ոչ թե ասեն՝ ազգանունը Տավարացյան, անունը Նախշուն։ Այսինքն փողոցային մակարդակի են հասնում արդեն»։