Ձեր վստահելի աղբյուրը

Երեկ Իջևանում ոստիկանների և քաղաքացիների միջև տեղի ունեցած բախումների դեպքի առթիվ հարուցվել է քրեական գործ, քրեական օրենագրքի 258-րդ հոդվածի (Խուլիգանությունը) 4-րդ մասի, 258-րդ հոդվածի 3-րդ մասի 1-ին կետով , ինչպես նաև 316-րդ հոդվածի (Իշխանության ներկայացուցչի նկատմամբ բռնություն գործադրելը) 2-րդ մասի հատկանիշներով: Panorama.am-ը տեղեկացավ ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնի պետ Նաիրա Հարությունյանից։ 

Քրեական գործը քննում է Քննչական կոմիտեի հատկապես կարևոր գործերի քննության գլխավոր վարչության մարդու դեմ ուղղված հանցագործությությունների քննության վարչությունում:
ՀԿԳ քննության գլխավոր վարչության պետի  հանձնարարությամբ կազմվել է քննչական խումբ, մշակվել է քննչական պլան: Այս պահին կան բերման ենթարկված անձինք:

Քննիչները և ոստիկանները ձեռնարկում են անհրաժեշտ քննչական, դատավարական, օպերատիվ-հետախուզական անհետաձգելի գործողություններ, դեպքի բոլոր հանգամանքները պարզելու և նրանցից յուրաքանչյուրի գործողություններին քրեաիրավական գնահատական տալու վերաբերյալ:

Հիշեցնենք, որ երեկ Իջևանում փայտի գործով զբաղվողները մի քանի ժամ փակել էին ճանապարհը,  պահանջում էին հանդիպում այն անձի հետ, ով հրաման էր տվել թույլ չտալ անտառից փայտ տանել: Բախում էր տեղի ունեցել ճանապարհը փակող ցուցարարների և ոստիկանների միջև, երբ վերջիններս  փորձել են պատ կազմել և ազատել ճանապարհը: Ցուցարարներն ընդդիմացել են և բախում է սկսվել։ Նրանք սկսել են քարեր նետել, ոստիկանները հետ են նահանջել։ Կան վիրավորներ, այդ թվում նաև ոստիկաններ։