Հայաստանում արդեն գործում է հայ-իտալական մշակութային տարածաշրջանային կենտրոն
Այսօր Հայաստանի ազգային պատկերասրահում հանդիսավորությամբ ազդարարվել է «Մշակութային ժառանգության զարգացման, կառավարման և պահպանման տարածաշրջանային կենտրոնի» գործունեության մեկնարկը՝ ՀՀ-ում Իտալիայի դեսպան Վինչենցո դել Մոնակոյի և ՀՀ կրթության, գիտության, մշակույթի և սպորտի նախարարի տեղակալ Նարինե Խաչատուրյանի մասնակցությամբ: Նախարարությունից հայտնում են, որ Կենտրոնը գործելու է մշակութային ժառանգության վերականգնման, զարգացման, կառավարման և հաղորդակցության ոլորտներում՝ նպաստելով Հայաստանի պատմամշակութային հուշարձանների կառավարման և զարգացման ոլորտներում նոր ենթակառուցվածքների ներդրմանը, ինչպես նաև ստեղծելու է հնարավորություններ տեղացի փորձագետների և մասնագետների վերապատրաստման համար:
Միջոցառմանը ներկա են եղել ՀՀ արտաքին գործերի նախարարության, ՀՀ վարչապետի աշխատակազմի սփյուռքի գործերի գլխավոր հանձնակատարի գրասենյակի, կրթական հաստատությունների գործընկերները, ինչպես նաև մշակութային ժառանգության ոլորտի մասնագետներ:
ՀՀ կրթության, գիտության, մշակույթի և սպորտի նախարարի տեղակալ Նարինե Խաչատուրյանը շնորհավորել է հայ-իտալական մշակութային ժառանգության զարգացման, կառավարման և պաշտպանության տարածաշրջանային կենտրոնի բացման կապակցությամբ և նշել, որ կենտրոնի շնորհիվ առաջին հերթին կվերականգնվեն հայաստանյան մշակութային արժեքները:
«Հայ-իտալական կենտրոնի ստեղծումը կնպաստի մշակութային ժառանգության պահպանմանը և կապահովի իտալական վերականգնողական դպրոցի փորձի փոխանակման գործընթացը: Կողմերը կհամագործակցեն մշակութային ու գիտական ոլորտներում՝ գրանցելով լավագույն արդյունքներ»,- ասել է նախարարի տեղակալը:
Նարինե Խաչատուրյանը շնորհակալություն է հայտնել Իտալիայի կառավարությանը և ՀՀ-ում Իտալիայի դեսպանին համատեղ ծրագրի իրականացման գործում ներդրած ջանքերի համար:
Իտալիայի դեսպան Վինչենցո դել Մոնակոյի խոսքով, կենտրոնը նաև տարածաշրջանային բացառիկ վայր է լինելու։ Նրա կարծիքով, այս համագործակցությունը նոր հարթակ կհանդիսանա Հայաստանի և Իտալիայի միջև։
Նախօրեին տեղի է ունեցել տարածաշրջանային կենտրոնի կառավարման խորհրդի անդրանիկ նիստը:
Հայաստանի ազգային պատկերասրահում գործող «Մշակութային ժառանգության զարգացման, կառավարման և պահպանման տարածաշրջանային կենտրոնը» ստեղծվել է ՀՀ կրթության, գիտության, մշակույթի և սպորտի նախարարության, Բոլոնիայի համալսարանի (Իտալիա) համագործակցության շրջանակում և Զարգացման համագործակցության իտալական գործակալության աջակցությամբ: «Մշակութային ժառանգության զարգացման, կառավարման և պահպանման տարածաշրջանային կենտրոնը» հանդիսավոր բացվել է 2018 թվականի հուլիսի 31-ին, Հայաստանի Հանրապետության և Իտալիայի Հանրապետության նախագահների մասնակցությամբ:
Լրահոս
Տեսանյութեր
Առնվազն երկու կողմ կա, ովքեր չէին ցանկանա, որ ԵԱՏՄ նիստը Հայաստանում անցկացվեր. Արթուր Խաչատրյան
