Ձեր վստահելի աղբյուրը

Ընդհանուր իրավասության դատարանի դատավոր Դավիթ Գրիգորյանի փաստաբան Գեորգի Մելիքյանը բողոքարկելու է իր պաշտպանյալի նկատմամբ քրեական գործ հարուցելու մասին որոշումը, ինչպես նաև դատական վերաքննության կարգով՝ խուզարկության որոշումը։

«Խախտումները էական են ու կոպիտ»,- Panorama.am-ի հետ զրույցում ասաց փաստաբանը՝ մանրամասնելով, որ խուզարկություն կատարելու մասին որոշում կայացրած դատարանը քննիչին պետք է պարտավորեցներ  Դավիթ Գրիգորյանին քննչական գործողության մասին տեղեկացնել մեկ օր առաջ, մինչդեռ որևէ մեկն այդ մասին Գրիգորյանին տեղյակ չի պահել։

Մելիքյանի խոսքով, դատավորն իր աշխատասենյակում նստած է եղել, երբ մտել են, կնիքել են, փորձել են առգրավել համակարգիչը։ Այդ պահին, ըստ փաստաբանի, եղել է միայն առգրավվման մասին որոշում։

«Դրանից հետո խուզարկության մասին որոշում են բերել ու խուզարկություն են կատարել։ Մենք գործողությունների իրավաչափությունը վիճարկել ենք, տեղեկացրել ենք Բարձրագույն դատական խորհուրդին, քանի որ այդ կառույցն է իրավասու դիմել գլխավոր դատախազին։ Սպասում ենք ԲԴԽ արձագանքին»,-ասաց նա։

Փաստաբանը նշեց, որ հանցագործության մասին հաղորդում է ներկայացրել Ոստիկանություն։ Իրավապհ այս մարմնից Panorama.am-ին հայտնեցին, փասատաբաննից ահազանգ ստացել են հուլիսին, ահազանով գործւ նյութերն ուղարկել են ըստ ենթակայության։ Գլխավոր դատախազությունից Panorama.am-ին ասացին՝  Դավիթ Գրիգորյանի հետ կապված այս պահին մեկնաբանություն չունեն։

Փաստաբանը ընդգծում է՝ իր պաշտպանյալի նկատմամբ քրեական գործ հարուցելու մասին որոշումը բողոքարկելու հարցով դիմելու են գլխավոր դատախազին, քանի որ դատախազը դուրս է եկել իր լիազորությունների սահմաններից, թույլ է տվել «հանցագործություն», քանի որ օրենքով նման իրավասություն նրան վերապահված չի եղել։

Մելիքյանի խոսքով, այն պահից, երբ ենթադրյալ հանցագործության մասին պաշտոնական հայտարարություն է արվում անձի առնչության մասին, այդ պահից սկսած նա ձեռք է բերում կասկածյալի կարգավիճակ։

«Քրեական գործի հարուցման որոշման մեջ հստակ ձևակերպումներ կան, որ պաշտոնեական կեղծիք կատարելու դեպքը կատարվել է դատավորի կողմից»,-ասաց նա՝ նշելով, որ փաստական հանգամանքերը չի կարող մեկնաբանել, քանի որ ձեռքի տակ եղած նյութերը սակավ են։
Անդրադառնալով տարածված այն տեղեկություններին, թե դատավորի համակարգչից տարել են ՀՀ երկրորդ նախագահ Ռոբերտ Քոչարյանի դեմ հարուցված քրեական գործի նյութերը, փաստաբան Մելիքյանը հաստատեց դրանք։

«Դատավոր աշխատասենյակի համակարգչից բացառապես առգրավվել է այն ամենը, ինչ հիշեցնում է Քոչարյան ազգանունը։ Բախտներս բերել է, որ մեր ազգանունն էլ Քոչարյան չի եղել, կարող է մեզ էլ առգրավեին։ Ամբողջ խնդիրն այն է, որ այնտեղ եղել են երեսուն և ավելի գործեր, դրանցից որևէ բան չի առգրավվել։ Որտեղ  որ Քոչարյանի գործին առնչվող, վերաբերելի կամ հիշեցնող փաստաթուղթ, կրիչ կամ ֆայլ է եղել, բոլորը առգրավվել են»,-ասաց փաստաբանը։

Հիշեցնենք, որ դատավոր Դավիթ Գրիգորյանի որոշմամբ, մայիսի 18-ին ՀՀ երկրորդ նախագահ Ռոբերտ Սեդրակի Քոչարյանի նկատմամբ ընտրված խափանման միջոց ընտրված կալանավորումը փոփոխեց, նրա նկատմամբ որպես խափանման միջոց ընտրվեց Արցախի Հանրապետության նախկին ու ներկա նախագահների՝ Արկադի Ղուկասյանի ու Բակո Սահակյանի անձնական երաշխավորությունը։

Նույն դատավորի որոշմամբ կասեցվեց Ռոբերտ Քոչարյանի քրեական գործով վարույթը և այն ուղարկվեց Սահմանադրական դատարան։

Ռոբերտ Քոչարյանին մեղադրանք է առաջադրվել այն բանի համար, որ նա 1998թ․ ապրիլի 9-ից մինչև 2008 թվականի ապրիլի 9-ը զբաղեցնելով ՀՀ Նախագահի պաշտոնը, ՀՀ Սահմանադրության ուժով հանդիսանալով պետության գլուխը և կրելով ՀՀ Սահմանադրությանը հետևելու, օրենսդիր, գործադիր և դատական իշխանությունների բնականոն գործունեությունն ապահովելու պարտականություններ, ինչպես նաև օժտված լինելով մշտապես կազմակերպչական-տնօրինչական և վարչատնտեսական, գործառույթներ իականացնող պաշտոնատար անձի լիազորություններով, այլ անձանց հետ հանցակցությամբ, տապալել է ՀՀ սահմանադրական կարգը, ինչպես նաև իր պաշտոնեական դիրքն օգտագործելով «Թի Էս Էս Սի Արմենիա» ՍՊ ընկերության միակ մասնակից և տնօրեն Սիլվա Համբարձումյանի օգտին գործողություններ կատարելուն նպաստելու, այն է՝ այդ ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար, 2008 թվականի փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 927․000․000 ՀՀ դրամին համարժեք 3․000․000 ԱՄՆ դոլար կաշառք։