Ձեր վստահելի աղբյուրը

Արցախի նախկին ՄԻՊ,  արդարադատության նախկին փոխնախարար, «Իրավական ուղի» ՀԿ-ի համահիմնադիր Ռուբեն Մելիքյանը, անդրադառնալով ՍԴ կողմից ՄԻԵԴ և Վենետիկի հանձնաժողով դիմելու արձագանքներին, գրել է.

«Նկատեցի, որ իշխող քաղաքական ուժի առանձին բարձրաստիճան ներկայացուցիչներ հրապարակավ տարակուսանք են հայտնում ՀՀ Սահմանադրական դատարանի կողմից խորհրդատվական եզրակացություն ստանալու համար Վենետիկի հանձնաժողովին դիմելու առթիվ՝ իբր, ընթացակարգերն են ոչ հստակ, իբր, ինչպե՞ս է հնարավոր վարույթում գտնվող գործով դիմել Վենետիկին, և այլն։

Կարճ ուսումնասիրություն կատարեցի և պարզեցի, որ Բարձր դատարանների կողմից Վենետիկին դիմելը սովորական երևույթ է՝ հարուստ պրակտիկայով։ Պարզ որոնմամբ գտա Վենետիկի հանձնաժողովի 30 խորհրդատվական եզրակացություն (amicus curiae opinion), որոնք վերաբերում են 8 պետությունների Բարձր դատարաններից (հիմնականում՝ Սահմանադրական դատարաններից) ստացված հարցումներին․ Վրաստան (6 գործ), Մոլդովա (7), Ալբանիա (6), Բոսնիա (6), Հյուսիսային Մակեդոնիա (2), Ուկրաինա (1), Ղազախստան (1), նույնիսկ Պերու (1 գործ)։

Բոլորն էլ վերաբերում են տվյալ պահին Դատարանի վարույթում քննվող գործերին, ու դժվար թե, օրինակ, Պերուի օրենսդրությունը նախատեսած լիներ Վենետիկին դիմելու հատուկ ընթացակարգ (բնականաբար՝ ոչ էլ Վրաստանի, Մոլդովայի և մյուսների)։

Իմ ցանկացած խոսքի դեկարտյան կասկածով վերաբերող անձնավորությունների համար տեղադրում եմ վկայակոչված Аmicus curiae-ների մի մասի շապիկները»։