Ձեր վստահելի աղբյուրը

«Երբ հուլիսի 8-ին Սահմանադրական դատարանի աշխատակարգային որոշմամբ դատարանի դիմումն ընդունվեց վարույթ, անձն այլևս չի կարող լինել կալանավորված»,-լրագրողների հետ հանդիպմանը հայտարարեց սահմանադրագետ, ՍԴ-ում ՀՀ երկրորդ նախագահ Ռոբերտ Քոչարյանի շահերը ներկայացնող Արամ Վարդևանյանը։

Իր պնդումը նա հիմնավորում է այսպես՝ կալանավորումը կիրառելու համար պետք է լինի հիմնավոր կասկած ու կալանավորման պայմանները։

«Եթե հիմնավոր կասկածն առկա չէ, այլևս չես էլ անդրադառնում կալանավորման պայմաններին։ Այս պարագայում հիմնավոր կասկածի առանցքը, մեխը հանդիսանում է Քրեական օրենսգրքի հոդվածը։ Այն  հոդվածը, որը սահմանադրականության խնդիր ունի։ ՍԴ-ն վարույթ է ընդունել դատարանի դիմումը, իսկ դիմումի բովանդակությունը վկայում է  այն մասին, որ 300.1 հոդվածը խնդիր ունի։ Այս պարագայում կալանավորումն առհասարակ չի կարող կիրառվել»,-մանրամասնեց փաստաբանը։

Նրա խոսքով, դատարանի դիմումը վարույթ ընդունելուց հետո Ռոբերտ Քոչարյանի՝ կալանքի տակ պահվելու ամեն օրը հանդիսանում է իրավունքի խախտում։

«Սա ոչ թե իմ մեկնաբանությունն է, այլ Եվրոպական դատարանի նախադեպից է բխում։ Մեր Վճռաբեկ դատարանի նախադեպից ու ամենակարևորը իրավունքի գերակայությունից է բխում։ Այս իրավիճակում մենք խոսում ենք, ոչ թե քրեական հետապնդման դադարեցման, այլ խափանման միջոցը փոխելու մասին»,-ասաց նա։

Վարդևանյանի  խոսքով, այս պարագայում դատավորը պետք է անհապաղ նիստ գումարի, անկախ ցանկացած հանգամանքից ու նշվի, որ հիմնավոր կասկածի դադարեցում է եղել, ինչն էլ նշանակում է՝ անհապաղ ազատ արձակում։