Ձեր վստահելի աղբյուրը

Ընդհանուր իրավասության դատարանի դատավոր Դավիթ Գրիգորյանի փաստաբան Գեորգի Մելիքյանն այսօր գլխավոր դատախազություն է ներկայացրել իր պաշտպանյալի նկատմամբ քրեական գործի հարուցման մասին որոշումը բողոքարկելու դիմումը։

Հիշեցնենք, որ Գրիգորյանի նկատմամբ հարուցվել է քրեական գործ ՔրՕր-ի 314 հոդվածի հատկանիշներով։ Հոդվածը սահմանում է. «Պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով` պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելը, կեղծում, քերվածք կամ այլ թվական գրառումներ կամ փոփոխություններ կատարելը, ինչպես նաև կեղծ փաստաթղթեր կազմելը կամ հանձնելը պատժվում է տուգանքով` նվազագույն աշխատավարձի երկուհարյուրապատիկից հինգհարյուրապատիկի չափով, կամ ազատազրկմամբ` առավելագույնը չորս տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով»։

 Panorama.am-ի հետ զրույցում փաստաբանն ասաց, մինչ այդ՝ հուլիսի 17-ին դիմել էին Բարձրագույն դատական խորհուրդ, որպեսզի այդ կառույցը միջնորդությամբ դիմի դատախազություն, բայց մինչ այս պահը որևէ արձագանք չկա։

Փաստաբանը վիճարկել է նաև դատավորի աշխատասենյակում  խուզարկություն և առգրավումներ իրականացնելու որոշումները։

«Ոչ իրավաչափ բոլոր գործողությունները բողոքարկել ենք»,-ասաց նա։

Գեորգի Մելիքյանը պնդում է,  խախտվել են Դավիթ Գրիգորյանի սահմանդրական իրավունքները։

«Ինձ զարմացնում է այն հանգամանքը, որ բացահայտ, ակնհայտ խախտվել է մարդու՝ իրավաբանական օգնություն ստանալու իրավունքը։ Մերժում են փաստաբանի մասնակցությունը։ Պատմության մեջ նման բան չի եղել։ Քննիչի մասնագիտական որակները դա են թույլ տալիս, դա Հատուկ քննչական ծառայության դեմքն է։ Նրանք մերժել են փաստաբանի մասնակցությունը խուզարկության գործողությանը, այն դեպքում, երբ Դավիթ Գրիգորյանը համաձայնություն է տվել ու պնդել, որ փաստաբանը մասնակցի այդ գործողությանը»,-ասաց նա՝ նշելով, որ դրան որևէ իրավական հիմնավորում տալ հնարավոր չէ։

Այս հարցով էլ դիմել են դատախազություն, նշել, որ քննիչը դուրս է եկել պաշտոնական լիազորությունների շրջանակից։

Խուզարկության արձանագրությունից փաստաբանը տեղեկացել է, որ առգրավվել են բացառապես ՀՀ երկրորդ նախագահ Ռոբերտ Քոչարյանի քրեական գործին առնչվող նյութերը։

«Անգամ միջնորդություններն են տարել, կրիչները։ Որտեղ եղել է Քոչարյանի ազգանունը, տարել են»,-նշեց փաստաբանը՝ մեկնաբանությունները թողնելով մարդկանց։

Մելիքյանի խոսքով, դատավոր Գրիգորյանը վճռական է, պայքարելու է մինչև օբյեկտիվ իրականությունը ջրի երես դուրս գա, իսկ իր ոտնահարված իրավունքները վերականգնվեն։