Ձեր վստահելի աղբյուրը

Այս տարվա հունիսի 1-ի դրությամբ հրդեհների կանչերի թիվը նախորդ տարվա համեմատությամբ աճել է առավել քան կրկնակի և այդ աճը պահպանվում է։ Հենց սա որպես հիմնավորում ներկայացրեց ԱԻ նախարար Ֆելիքս Ցոլակյանը կառավարության նիստում ներկայացվող նախագծին։

Նա առաջարկում է օրենքում կատարել փոփոխություններ` ավելացնելով եկամուտները և ծախսերը 261 մլն 383 հազար դրամով։

Նախարարը մանրամասնեց, հրդեհների հետ կապված կանչերի ավելացման հետևանքով առաջացել է վառելիքի գերածախս, որը բերել է Փրկարար ծառայության 3-րդ և 4-րդ եռամսյակի համար նախատեսված վառելիքի օգտագործմանը:

«Եթե 2018-ի առաջին կիսամյակում գրանցվել է 1395 կանչ, ապա 2019-ի առաջին կիսամյակում՝ 2920 կանչ։ Աննախադեպ աճ է եղել։ Հրդեհների քանակի և ծավալի աճի պատճառով հրշեջ-փրկարարական ջոկատները շատ դեպքերում արձագանքում են հարակից տարածքները սպասարկող ջոկատների կանչերին»,-ասաց Ցոլակյանը։

Նա մանրամասնեց, որ վառելիքի ծախսի ավելացումը պայմանավորված է նաև հրշեջ-փրկարարական ավտոմեքենաների թվաքանակի աճով՝ 2019 թվականին Ճապոնիայի կառավարության կողմից տրամադրվել է 28 միավոր հրշեջ-փրկարարական տեխնիկա՝ ավտոբաքեր, ավտոսանդուղքներ, փրկարարական մեքենաներ՝ հագեցած անհրաժեշտ գույքով և փոքր մեխանիզացիայով: Մինչև տարեվերջ Ճապոնիայի կառավարության կողմից հատկացվելու են ևս 22, իսկ Ռուս-հայկական հումանիտար արձագանքման կենտրոնի կողմից` 26 միավոր հրշեջ-փրկարարական տրանսպորտային միջոցներ:

Հարկ է նաև նշել, որ 2019 թվականի 2-րդ կիսամյակի ընթացքում հնարավոր չէ ապահովել արտակարգ իրավիճակներին, պատահարներին և այլ դեպքերին արձագանքման կազմակերպումը առանց լրացուցիչ վառելանյութի (35000 լիտր բենզին և 65000 լիտր դիզելային վառելիք` 42 մլն. 325 հազ. դրամ ընդհանուր արժեքով), որից 50000 լիտր վառելանյութը կլրացնի 2019թ.-ին ակնկալվող պակասորդը, իսկ 50000 լիտր վառելանյութը կպահեստավորվի 2020թ.-ի հունվար ամսվա համար:

Նախարարը բացի բենզինից, բարձրացրեց նաև գույքի ու մարտական համազգեստի հարցը։ Ասաց՝  բուսածածկ դժվարամատչելի վայրերի հրդեհների ժամանակ անհնար է կիրառել հրշեջ ավտոբաքեր, ուստի խիստ անհրաժեշտ է ստորաբաժանումներն ապահովել պարզագույն հրդեհաշիջման միջոցներով (150հատ բենզինային և 350 հատ մեխանիկական ուսապարկ-սրսկիչներ՝ 14 մլն. 700 հազար դրամ ընդհանուր արժեքով):

Փրկարար ծառայության հաշվեկշռում ներառված 70 բենզինային սրսկիչներից շահագործման պիտանի են ընդամենը 9-ը: 2019թ-ին ՄԱԿ-ի զարգացման գրասենյակի կողմից որպես նվիրատվություն Փրկարար ծառայությանն են տրամադրվել 180 հատ մեխանիկական ուսապարկ-սրսկիչներ, որնք բաշխվել են մարզային, Երևան քաղաքի և ՀՆՓԱԻԿ ստորաբաժանումներին՝ նվազագույն քանակությամբ, ինչը և քանակապես, և որակապես չի ապահովում հրդեհային կանչերի արձագանքման պատշաճ մակարդակ: 

Մարտական համազգեստով ապահովված է ՀՓՋ-ների երեք հերթափոխներից մեկը, չնայած այն հանգամանքին, որ մարտական համազգեստը հանդիսանում է անհատական օգտագործման գույք, ուստի անհրաժեշտ է 530 լրակազմ մարտական հագուստ՝ 95 մլն 400 հազ. դրամ ընդհանուր արժեքով, յուրաքանչյուր հերթափոխին մեկական լրակազմով (սաղավարտ, բաճկոն, տաբատ, գոտի, ձեռնոց, կոշիկ) ապահովելու համար:

«Մինչև հիմա ԱԻՆ-ը թափառող շների հետ կապված գործառույթներ չի արել։
Մենք սկսել ենք դա անել։ Պարոն Օսիպյանն ինձ ասեց, ահազանգ կար Վայոց Ձորից արջի հետ կապված, դրանք մեզ անհրաժեշտ են այդ աշխատանքների իրականացման համար»,-ասաց Ցոլակյանը։

Ձեռք բերվելիք սաղավարտները կունենան նկարահանման ու օնլայն հեռարձակման հնարավորություն, դա հրդեհների մարման ժամանակ կօգնի կառավարման կենտրոնին։
«Առանց այդ էլ մեր փոքր անձնակազմերը երբ մեկնում են դեպի վայր, մեկը սկսում է հեռախոսով նկարել, զբաղված է լինում ու որակ չկա»,-ասաց նախարարը։

Ցոլակյանն ասաց՝ նախագծի ընդունմամբ  կապահովվի  Փրկարար ծառայության բնականոն աշխատանքը, արագ արձագանքումը և փրկարարական աշխատանքները  կիրականացվեն ավելի բարձր և արդյունավետ մակարդակով:

Նախագծին դեմ քվեարկողներ չեղան, Ցոլակյանը շնորհակալություն հայտնեց։