Ձեր վստահելի աղբյուրը

«Դատավոր Դավիթ Գրիգորյանի աշխատասենյակում քննչական գործողությունները սկսել են առանց նրա գիտության ու համաձայնության, մինչդեռ օրենսդրությունն ուղղակի պահանջ է ներկայացնում, որ առնվազն մեկ օր առաջ գործողություն իրականացնող մարմինը կամ անձը պետք է իրազեկի այդ մասին»,-լրագրողների հետ հանդիպմանը հայտարարեց դատավորի փաստաբան Գեորգի Մելիքյանը։

Նա մանրամասնում է՝ հուլիսի 16-ին ժամը 14։00-ի սահմաններում դատավորի աշխատասենյակ է ներկայացել ՀՔԾ հատկապես կարևոր գործերով քննության վարչության քննիչ Խորեն Մեժլումյանը։ Առգրավում կատարելու որոշման հիման վրա փորձել է կատարել քննչական գործողություն, արգելել է դատավորի մասնակցությունը տվյալ գործողությանը։

«Նույնիսկ այն առարկություններից հետո, որ առգրավումը պետք է իրականացվի դատավորի մասնակցությամբ»,-ասաց նա։

Խուզարկության ժամանակ ևս դատավորին թույլ չեն տվել մասնակցել գործողությանը, ի պատասխան դատավորն ու պաշտպանը հայտարարել են՝ ապօրինի գործելու դեպքում աշխատասենյակի դռան բանալին չեն տրամադրի։  Ըստ փաստաբանի, կես ժամ հեռախոսով ինչ-որ մեկի հետ զրուցելուց հետո քննիչը վերադարձել է ու տեղեկացրել, որ մասնակցել կարող է միայն դատավորը, փաստաբանին թույլ չեն տվել։

«Մենք պահանջել ենք, որ արձանագրվի այդ բոլոր խախտումները։ Քննիչը նշել է դրան»,-ասաց նա։

Մելիքյանն ընդգծեց, դատարանի որոշմամբ թույլ էր տրված խուզարկություն կատարել դատավորի և նրա օգնականի աշխատասենյակում, սակայն քննիչը կատարել է գործողությունները նաև երրորդ՝ նիստերի քարտուղարի ու գործավարի աշխատասենյակում։

«Հատկանշական է, որ արձանագրության համաձայն, կրիչների ու փաստաթղթերի մեծ մասն առգրավել են հենց այդ աշխատասենյակից, այսինքն՝ անօրինական կերպով»,-ասաց Մելիքյանը։

Փաստաբանն իր հետ ասուլիսին բերել էր դատավորի աշխատասենյակի կնիքած դռան լուսանկարը, նշեց դուռը կնիքելն ունի շատ լուրջ իրավական հետևանքներ։ Բանախոսը մանրամասնեց, Սահմանադրության 32 հոդվածի պահանջի համաձայն դռան կնիքումը պետք է լինի դատարանի որոշմամբ, ինչը չի եղել։ Արդյունքում դատավորը զրկված է իր բնականոն գործունեությունն իրականացնելու հնարավորությունից։

Դատավորի շահերի պաշտպանն ասաց, իրենք բողոքարկել են խուզարկության, առգրավման որոշումները, դրանց իրականացման իրավաչափությունը։ Փաստաբանն ընդգծեց, որ դատավորի նկատմամբ կարելի է քրեական հետապնդում իրականացնել բացառապես ԲԴԽ համաձայնությամբ, ինչը չի եղել, հետևաբար հարուցման որոշումը դատավորի իրավունքների խախտումով է ընդունված։

«Այդ հիմքով պահանջել են վերացնել քրեական գործի հարուցման որոշումը»,-ասաց նա։

Մելիքյանն ասաց, բացի այս խախտումների վերացումից, պետք է ապահովվի դատավորի և նրա անկախության նկատմամբ հարգանքը։

«Այնինչ, հիմա նրա հեղինակությունն է ոտնահարվում»,-ասաց նա։

Փաստաբանը նշեց, իր կարծիքով, հաջորդ խախտումը,  երբ  Քրեական օրենսգրքի 314 հոդվածով նախատեսված միջին ծանրության արարքի դեպքում լինում է խուզարկության ու առգրավման որոշումը, ինչն արվում է ծանր և առանձնապես ծանր հացագործությունների դեպքում, բացի այդ առգրավել են քրեական գործի հետ կապ չունեցող նյութեր ու կրիչներ։

«Դա խոսում է օրենքի կամայական մեկնաբանման, ապօրինի գործելոճի մասին»,-ասաց Մելիքյանը։

Նա ուշադրություն հրավիրեց հանգամանքի վրա, երբ քննիչը խուզարկության միջնորդության մեջ նշել է, որ դատավորի սենյակում կարող են լինել Քրեական օրենսգրքով արգելված իրեր և առարկաներ, իսկ դատարանը գտնում է, որ այդ միջնորդությունն իրավաչափ է։

«Մենք փաստում ենք, հրապարակային հայտարարում ենք, որ դատավորի աշխատասենյակում կան և թմրանյութեր, առնվազն տասն և ավելի փաթեթներով, առնվազն 4-5 հրազեն տեսակի զենքեր, պայթուցիկ նյութեր։ Բայց արդյոք քննիչը պարտավոր չէ՞ր հստակեցնել, որ այդ իրերը պետք է անօրինական կերպով գտնվեն Դավիթ Գրիգորյանի մոտ։ Այն հանգամանքը, որ դատարանն անլուրջ է գտնվել ու խուզարկություն թույլ տալիս այդ հանգամանքը դիտարկել է իրավաչափ, գտնում ենք, որոշակի առումով ազդեցության արդյունքում է այդ որոշումը կայացվել, իսկ իրեղեն ապացույցները հատ-հատ ստուգվել են»,-ասաց նա՝ պնդելով, որ դատավոր Դավիթ Գրիգորյանի նկատմամբ առկա է թիրախավորված քննություն։