«Նրանց քույրը» մոնոներկայացումը կցուցադրվի թունելում
Հուլիսի 30-ին, ժամը 20:50-ին Մանկական երկաթուղու երկաթգծի թունելում կցուցադրվի «Նրանց քույրը» մոնոներկայացումը ՝ դերասանուհի Նորա Բադալյանի կատարմամբ։ Այդ մասին Panorama.am-ին տեղեկացրել է ներկայացման երիտասարդ բեմադրիչ Հռիփսիմե Շահինյանը։ Սա նրա երկրորդ աշխատանքն է Ն. Բադալյանի հետ։
Լոտ Վեկեմանսի «Նրանց քույրը» մոնոներկայացման առաջնախաղը կայացել էր «Արմմոնո» 17-րդ միջազգային թատերական փառատոնի շրջանակներում։
«Ներկայացումը թունելում խաղալու միտքը առաջացել է փորձերի ժամանակ, այսպես ասած, բեմադրելիս: Սակայն դա էլ է ունեցել իր նախապատկերը, որը առաջացել էր պիեսի հենց առաջին ընթերցումից. ես այդ կերպարին տեսա երկու պատերի արանքում, նեղ, սեղմված, կարծես, աջ կամ ձախ գնալու հնարավորությունից զրկված, իսկ առջևում հանդիսատեսն է, ետևում՝ խոր խավար։ Օրինաչափորեն ես հետո մոռացա այդ պատկերը, երբ սկսեցինք փորձերը, սակայն այն նաև վերադարձավ որոշ չափով՝ դերակատարման մեջ ( կերպարը միայն առաջ-ետ շարժման մեջ է): Իսկ երբ բեմադրությունը մոտենում էր ավարտին, ես շարունակ մտովի փնտրում էի այն տարածքը, որը կհամապատասխաներ, և ունեի այն զգացումը, որ դա բեմ չէ: Անընդհատ մտածում էի թունելի մասին։ Պրեմիերաները խաղացինք բեմում, սակայն հենց բեմում փորձեցինք ստանալ թունելային լուսավորություն:
Միտքս շարունակ փնտրում էր: Ընկերներիս անընդհատ հարցնում էի հնարավոր թունելի մասին: Եվ շատ հետաքրքիր և բարեհաջող ձևով հասանք Մանկական երկաթուղու երկաթգծի թունելին, որտեղ մեզ ընդունեցին շատ բարեհամբույր»,- պատմել է Հռիփսիմե Շահինյանը։
Մի շարք մոնոներկայացումներից ծանոթ դերասանուհի Նորա Բադալյանը նշել է, որ ինքը այն դերասաններից է, որը երբեք չի խուսափում փորձարարություններից։
«Երբ որոշում կայացվեց ներկայացումը խաղալ թունելում, ինձ այդ գաղափարը շատ հետաքրքիր թվաց։ Մանավանդ, որ ի սկզբանե, բեմադրիչը պատկերացնում էր հերոսուհուն հենց այդտեղ։ Դա փորձեցինք ստանալ թատրոնի բեմում»,- նշել է նա։
Ն. Բադալյանը ասել է, որ Մանկական երկաթուղու տնօրինությունն իրենց մեծ սիրով է տրամադրել տարածքը, ինքն արդեն մեկ անգամ խաղացել է այդ տարածքում։
«Մեր, այսպես ասած, ուղևորությունը սկսում է Մանկական երկաթուղու կայարանից, ուղևոր-հանդիսատեսին գնացքը տեղափոխում է դեպի թունել, որտեղ չկա ոչ լույս, ոչ ձայն, միայն մոմեր են վառվում։ Բայց որպեսզի դիսկոմֆորտի զգացողություն չլինի հանդիսատեսի մոտ, մենք առաջարկում ենք աթոռներ։ Ներկայացումը մոտավորապես քառասուն-քառասունհինգ րոպե է տևում»,- նշել է դերասանուհին։
Խոսելով հոլանդացի հեղինակ՝ Լոտ Վեկեմանսի պիեսի մասին՝ Ն. Բադալյանն ասել է, որ ներկայացումը սիրո, ընտրություն կայացնելու մասին է, և որ մարդիկ, երբեմն, չեն նկատում իրենց սիրող մարդկանց։
«Ամբողջ կյանքի ընթացքում մեզ, կարծես, հետապնդում է ընտրություն կայացնելու հարցը։ Կարելի է ասել, որ ամեն ժամ, ամեն րոպե, ամեն վայրկյանայն մեզ հետ է։ Եվ կարևոր չէ, թե ինչ հարց է։ Այն կարող է լինել շատ պարզունակ՝ կենցաղային և հակառակը՝ գլոբալ։ Եվ դու պետք է ընտրություն կայացնես»,- ասել է նա։
Լոտ Վեկեմանսի «Նրանց քույրը» ներկայացման նախագծի հեղինակն է ՀՀ վաստակավոր արտիստ Նարինե Գրիգորյանը, պիեսի թարգմանիչներն են՝ Լիլիթ Ալեքսանյանն ու Նաիրա Վան Խեյնհաուզենը։
Լուսանկարները՝ նախորդ ներկայացումից։
Լրահոս
Տեսանյութեր
Առնվազն երկու կողմ կա, ովքեր չէին ցանկանա, որ ԵԱՏՄ նիստը Հայաստանում անցկացվեր. Արթուր Խաչատրյան
