Ձեր վստահելի աղբյուրը

«Մեկ տարի առաջ սկսվեց այն անօրինականությունը, որը ներկայիս կառավարությունը կատարում է Արցախի հերոս, նախագահ Ռոբերտ Քոչարյանի հանդեպ»,- կառավարության դիմաց բողոքի ակցիայի ժամանակ հայտարարեց Ռ. Քոչարյանի աջակիցներից Արմեն Մինասյանը։

Նշենք, որ ՀՀ երկրորդ նախագահ Ռոբերտ Քոչարյանի աջակիցները հավաքվել են կառավարության շենքի մոտ՝ պահանջելով ազատ արձակել նրան։ Ակցիայի մասնակիցները պարբերաբար գոռում են՝ «Ազատություն Քոչարյանին», «Քոչարյան հերոս», «Քոչարյան, հաղթանակ», «Նիկոլ խաբեբա»։

Աջակիցներից Նարեկ Մանթաշյանն ասաց, որ մեկ տարի ապօրինի քաղաքական հետապնդման է ենթարկվում Արցախի առաջին նախագահ, ՀՀ երկրորդ նախագահ Ռոբերտ Քոչարյանը, յոթ ամիս  ապօրինի կալանավորված է։

«Այստեղ հավաքվելու բուն պատճառն ոչ թե այն է, որ չենք գիտակցում, որ կառավարությունն արդարադատություն չի իրականացնում, հասկանում ենք ու գիտակցում, որ այսօրվա արդարադատությունն իրականացվում է այս շենքից, հրահանգներն իջեցվում են այս շենքից»,- նշեց նա։

Ն. Մաթաշյանի խոսքով, մեկ տարի է դատական համակարգն ուզի-չուզի կալանք է տալիս, դատավորների մեծամասնությունն աշխատում են օրվա իշխանությունների քիմքին հարմարեցված։

«Սա բերելու է  արդարադատության համակարգի պարալիզացմանը։ Այստեղից կոչ եմ անում օրվա իշխանություններին, քանի որ հեռու չէ այն օրը, որ իրենք են կանգնելու նույն դատարանների առաջ պատասխան տալու, մի միջամտեք դատական գործերին, որովհետև այդ ամենը  բումերանգի էֆեկտով  ձեր դեմ է պտտվելու։ Ականատես ենք, թե ինչպես է օրվա իշխանությունն ի դեմս Նիկոլ Փաշինյանի, դարձել Ռոբերտ Քոչարյանի գերին։ Գերի ասելով նկատի ունեմ, որ  իր առօրյան կառուցվում է Ռոբերտ Քոչարյանի հետագծով։ Քոչարյանի գործն առաջին ատյանի դատարանում է, ճնշում են գործադրում առաջին ատյանի վրա, Վերաքննիչում է, Վերաքննիչի վրա։ Վերջերս արդեն սկսել են Սահմանադրական դատարանի ու այդ դատարանի նախագահի վրա ճնշումները»,- նշեց Ռ. Քոչարյանի աջակից Ն. Մանթաշյանը։

Նա ասաց, որ այսօրվա  իշխանությունը 70 տոկոսի փոխարեն արդեն ունի 40-45 տոկոս ժողովրդի վստահություն։

«Դուք այսօր շատ մոտ եք մերժված կառավարություն լինելուն, որովհետև ոչ մի ջանք չեք խնայում,  որպեսզի մերժեք ժողովրդական պահանջները, ամեն ինչ անում եք միջամտելու ու կազմալուծելու դատական համակագը»,- նշեց ակցիայի մասնակիցը։ 

Նա ասաց, որ հավաքվել են այստեղ պահանջելով ոչ թե ազատություն հանուն Ռ. Քոչարյանի, հանուն իրենց բարի կամքի, իրենց պահանջը հստակ է՝ մի միջամտեք դատական արդարադատությանը. «Դատարաններին չմիջնորդելու դեպքում վստահ ենք, որ այն ազատությունը, որին արժանի է, որի համար բոլորս պայքարում ենք, շատ շուտ կհասնի իր հասեցատիրոջը, որովհետև ոչ մի ողջամիտ դատավոր չի կարող կարված գործով կալանք տալ, առավել ևս բանտարկել Ռոբերտ Քոչարյանին։ Թույլ տվեք դատավորներն գործել անկախ, Հայաստանի օրենքներին համահունչ կայացնեն իրենց որոշումները»,- ասաց Ն. Մանթաշյանը։

Ա. Մինասյանի խոսքով, իրենք միայն արդարադատության են պահանջում, չեն մուրում ազատություն։

«Օրեցօր շատացող մեր շարքերով մենք կպարտադրենք ձեզ արդարադատություն, երբեք չկասկածեք»,- ասաց նա։