Ձեր վստահելի աղբյուրը

Գտնել մարդ, որ Մարտի 1-ի դեպքերը ողբերգություն չի համարում ու չի ուզում ի վերջո զոհեր տված դեպքերի մեղավորներին ու հենց սպանողներին պատժված տեսնել՝ դժվար է գտնել։ Ու այո՝ Հայաստանի գործող իշխանությունն իր կարևոր խնդիրներից մեկն է համարում «Մարտի 1»-ի դեպքերի բացահայտումը, տաս սպանությունների մեղավորներին գտնելն ու պատժելը։ Նրանք այդ մասին բարձրաձայնում են հենց իշխանության գալու առաջին օրվանից, նաև՝ մինչև իշխանության գալը։ Արդեն մեկ տարի է անցել իշխանափոխությունից, սակայն այդպես էլ որևէ մեկը պատժված չէ սպանությունների համար։ Նոր իշխանության առաջին գործերից մեկը եղավ  նախկին մի քանի բարձրաստիճան պաշտոնյաների «Մարտի 1»-ի գործի շրջանակներում մեղադրանք առաջադրել, այդ թվում ՀՀ երկրորդ նախագահ Ռոբերտ Քոչարյանին։ Շատերն են կարծում՝  սա ընդամենը «քաղաքական և անձնական հաշվեհարդար է», կարծիքներ են հնչում, որ Ռ. Քոչարյանը քաղաքական բանտարկյալ է։ ՀՀ երկրորդ նախագահն այս մեկ տարվա ընթացքում երեք անգամ կալանավորվել է, երկու անգամ նրա խափանման միջոցը փոխվել է և նա ազատ արձակվել։

Մեկ տարվա ժամանակագրություն
Մեկ տարի առաջ՝ 2018  հուլիսի 28-ին,  առաջին ատյանի դատարանը, նախագահությամբ դատավոր Վաչե Մարգարյանի, բավարարել էր Հայաստանի երկրորդ նախագահ Ռոբերտ Քոչարյանին կալանավորելու՝ Հատուկ քննչական ծառայության միջնորդությունը։ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա 2018 թվականի հուլիսի 26-ին Հայաստանի Հանրապետության պաշտոնաթող նախագահ Ռոբերտ Քոչարյանին մեղադրանք էր առաջադրվել «Մարտի 1» -ի գործի շրջանակներում  ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:

Ռ. Քոչարյանը կալանքի տակ էր մնացել ընդամենը 17 օր։ Նրա փաստաբանները երկու հայց էին ներկայացրել Վերաքննիչ դատարան՝  պահանջելով  բեկանել առաջին ատյանի դատարանի որոշումը և խափանման միջոց ընտրված կալանքը փոխարինել գրավի դիմաց ազատ արձակմամբ։ Սակայն ՀՀ Վերաքննիչ քրեական դատարանը, դատավոր Ալեքսանդր Ազարյանի նախագահությամբ,  օգոստոսի 13-ին Ռ. Քոչարյանի խափանման միջոցը փոխելու հարցով որոշում էր կայացրել այն հիմքով, որ նա անձեռնմխելի է։

Ինչպես մեղադրանքի կողմն, այնպես էլ պաշտպանական կողմը Վերաքննիչ դատարանի այս որոշումը բողոքարկել էին Վճռաբեկ դատարան: Վճռաբեկ դատարան բերված Դատախազության բողոքը վերաբերում էր միայն անձեռնմխելիության հիմքին: Պաշտպանական կողմն ի հավելումն  անձեռնմխելիության հիմքին՝  Վերաքննիչ դատարան էին ներկայացվել նաև այլ, ոչ պակաս կարևոր հիմնավորումներ,  որոնց Վերաքննիչ դատարանը չէր անդրադարձել, և այդ պատճառով բերվել էր Վճռաբեկ բողոք։ 2018 թ. նոյեմբերի 15-ին ՀՀ Վճռաբեկ դատարանը որոշել էր  ՀՀ գլխավոր դատախազ Արթուր Դավթյանի բողոքը բավարարել մասնակիորեն, իսկ պաշտպաններ Ալումյանի, Սահակյանի, Օրբելյանի, Խուդոյանի բողոքները մերժել։  Դատարանը որոշել էր, ՀՀ Վերաքննիչ քրեական դատարանի 2018 թվականի օգոստոսի 13-ի որոշումը բեկանել և գործն ուղարկել նույն դատարան՝ նոր քննության։ Դեկտեմբերի 7-ին Վերաքննիչ քրեական դատարանը,  նախագահությամբ դատավոր Ռուբիկ Մխիթարյանի, որոշում էր կայացրել կրկին կալանավորել ՀՀ երկրորդ նախագահին։

Որոշումից հետո Ռոբերտ Քոչարյանը ինքնակամ ներկայացել էր «Երևան- Կենտրոն» ՔԿՀ։

2018 թ. դեկտեմբերի 7-ից մինչև 2019թ. մայիսի 18-ը նա մնացել էր կալանքի տակ։ Երևանի ընդհանուր իրավասության դատարանը, դատավոր Դավիթ Գրիգորյանի նախագահությամբ, մայիսի 18-ին որոշել էր ՀՀ երկրորդ նախագահ Ռոբերտ Քոչարյանի նկատմամբ խափանման միջոց ընտրված կալանավորումը փոփոխել և  որպես խափանման միջոց ընտրվել էր Արցախի Հանրապետության գործող և նախկին նախագահներ Բակո Սահակյանն ու Արկադի Ղուկասյան անձնական երաշխավորությունը։

Հունիսի 25-ին Վերաքննիչ քրեական դատարանը, նախագահությամբ Արմեն Դանիելյանի, բավարարել էր դատախազության, տուժողների ներկայացուցիչ Սեդա Սաֆարյանի բողոքները՝ մայիսի 18-ի՝ Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և նույն դատարանի մայիսի 20-ի՝ քրեական գործի վարույթը կասեցնելու և Սահմանադրական դատարան դիմելու որոշումը: Հիշեցնենք, որ Վերաքննիչ քրեական դատարանը թույլ չէր տվել ՀՀ երկրորդ նախագահ Ռոբերտ Քոչարյանի պաշտպաններին ներկայացնել իրենց դիրքորոշումները և, կոպտորեն ոտնահարելով մրցակցային դատավարության սկզբունքը, հեռացել էր խորհրդակցական սենյակ՝ դատական ակտ կայացնելու։

Ինչպես նախորդ անգամ, այս անգամ էլ Ռ. Քոչարյանը ինքնակամ ներկայացել էր «Երևան- Կենտրոն» ՔԿՀ։

«Կարծում եմ, դուք տեսել եք, ոչ օրենք կա, ոչ էլ օրինականություն։ Այնքան ասելիք ունեմ»,- նախքան ՔԿՀ մտնելը՝  լրագրողներին ասել էր Ռոբերտ Քոչարյանը։

Հուլիսի 11-ին պաշտպանները վճռաբեկ բողոքներ են ներկայացրել Ռ․Քոչարյանի նկատմամբ ընտրված խափանման միջոց կալանքը վերացնելու վերաբերյալ:

ՀՀ Սահմանադրական դատարանը  Ռոբերտ Քոչարյանի գործով դիմում է ՄԻԵԴ-ին և Վենետիկի հանձնաժողովին։ Հուլիսի 18-ին Հայաստանի Հանրապետության Սահմանադրական դատարանն ընդունել է աշխատակարգային որոշումներ՝ «Երևան քաղաքի ընդհանուր իրավասության դատարանի և Ռոբերտ Քոչարյանի դիմումների հիման վրա՝ Հայաստանի Հանրապետության քրեական օրենսգրքի 300.1-րդ հոդվածի՝ Սահմանադրությանը համապատասխանության հարցը որոշելու վերաբերյալ» գործերով խորհրդատվական կարծիք ստանալու նպատակով Մարդու իրավունքների եվրոպական դատարանին և Վենետիկյան հանձնաժողովին դիմելու և այդ կապակցությամբ հիշյալ գործերի վարույթները՝ մինչև պատասխանները ստանալը, «Սահմանադրական դատարանի մասին» սահմանադրական օրենքի 56-րդ հոդվածի առաջին մասի 5-րդ կետի հիմքով կասեցնելու վերաբերյալ:

Նշենք, որ 2019 թ. փետրվարի 12-ին Հատուկ Քննչական ծառայությունը Ռոբերտ Քոչարյանին նոր մեղադրանք էր առաջադրել ՀՀ քրեական օրենսգրքի 311-րդ հոդվածի 4-րդ մասի 2-րդ կետով՝ առանձնապես խոշոր չափի կաշառք ստանալու վերաբերյալ։ ՀՀ երկրորդ նախագահին  առաջադրված նոր մեղադրանքն առնչվում է քաղաքացի Սիլվա Համբարձումյանի կողմից կատարված՝ ենթադրյալ կաշառք տալու հայտարարությանը:

Ռ. Քոչարյանի մեղադրական եզրակացության համառոտ բովանդակությունը՝ ըստ Դատական տեղեկատվական համակարգի. Ռոբերտ Քոչարյանը մեղադրվում է 1998թ․ ապրիլի 9-ից մինչև 2008 թվականի ապրիլի 9-ը զբաղեցնելով ՀՀ Նախագահի պաշտոնը, ՀՀ Սահմանադրության ուժով հանդիսանալով պետության գլուխը և կրելով ՀՀ Սահմանադրությանը հետևելու, օրենսդիր, գործադիր և դատական իշխանությունների բնականոն գործունեությունն ապահովելու պարտականություններ, ինչպես նաև օժտված լինելով մշտապես կազմակերպչական-տնօրինչական և վարչատնտեսական, գործառույթներ իականացնող պաշտոնատար անձի լիազորություններով, այլ անձանց հետ հանցակցությամբ, տապալել է ՀՀ սահմանադրական կարգը, ինչպես նաև իր պաշտոնեական դիրքն օգտագործելով «Թի Էս Էս Սի Արմենիա» ՍՊ ընկերության միակ մասնակից և տնօրեն Սիլվա Համբարձումյանի օգտին գործողություններ կատարելուն նպաստելու, այն է՝ այդ ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար, 2008 թվականի փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 927․000․000 ՀՀ դրամին համարժեք 3․000․000 ԱՄՆ դոլար կաշառք։

Ուրիշ ի՞նչ։
Ուրիշ ոչինչ ու ոչ ոք։