Ձեր վստահելի աղբյուրը

ՀՀ երկրորդ նախագահի գրասենյակի ղեկավար Վիկտոր Սողոմոնյանը լրագրողների հետ հանդիպմանը ներկայացրեց Ռոբերտ Քոչարյանի դեմ իրականացվող քրեական հետապնդման մեկ տարվա ընթացքում  վարույթն իրականացնող մարմնի, գլխավոր դատախազության և դատարանների կողմից թույլ տրված խախտումները։

Սողոմոնյանը դրանք որակեց կոպիտ։ Նախապես պատրաստած ցանկում ընդգրկված է 29 խախտում, ինչպես վստահեցրեց Սողոմոնյանը, ցանկն ամբողջական չէ, առանձին խախտումներ իրենց մեջ պարունակում են նյութական ու դատավարական նորմերի բազմաթիվ խախտումներ։

«Փաստերը շատ են, եթե ես կարդամ ու սկսեմ մեկնաբանել, ասուլիսի ողջամիտ ժամկետներից դուրս կգամ։ Սակայն այս ամենի մեջ անկյունաքարայինն այն է, որ Ռոբերտ Քոչարյանին առաջադրված մեղադրանքը երբևէ չի պարզաբանվել, երբևէ։ Դրանում առկա և մատնաշնված անորոշ ձևակերպումները երբեք չեն հստակեցվել ոչ քննիչի, ոչ էլ դատախազի կողմից»,-ասաց նա՝ հիշեցնելով, որ մեղադրանքի պարզաբանման պահանջ եղել է Ռոբերտ Քոչարյանի ու նրա պաշտպանների կողմից։

Նա անդրադարձավ այն մեղադրանքներին, որ եղել է զինված ուժերի ապօրինի օգտագործում, պնդեց՝ դա եղել է օրինական, և մեկ անգամ չէ, որ ապացուցվել է և հրապարակային դատավարության, և տարբեր բանավեճերի ընթացքում։

«Սակայն մեղադրական կողմը շարունակում է համառել։ Բայց եթե նույնիսկ մենք ենթադրենք, որ զինված ուժերն օգտագործվել են ապօրինի, ապա որևէ օրենք, սահմանադրության որևէ նորմ չի մատնանշվում, որ դա նշանակում է  սահմանադրական կարգի տապալում։ Ի դեպ, քանի խոսում ենք զինված ուժերից, տանկեր, որոնց թրթուրների տակ ընդդիմադիր երևույթներ են ճզմվել, քաղաքում ընդհանրապես չեն եղել։ Սա Նիկոլ Փաշինյանի հերթական սուտն է»,-ասաց Սողոմոնյանը։

Անդրադառնալով ստեղծված իրավիճակի պատճառներին, Սողոմոնյանն ընդգծեց, այս գործի հիմքում դրված է կեղծիք։

«Դրված է տերպետրոսյանական հայտնի հայեցակարգը, որ չար ուժերը տանկերը հանեցին իր դեմ, ինքը հաղթել էր, սակայն չթողեցին, որ ինքը դառնա հանրապետության նախագահ։ Սա կեղծիք է, որը տարբեր դրսևորումներ է ունեցել տարիներ շարունակ նաև Նիկոլ Փաշինյանի կողմից։ Անցած տարի՝ հուլիսի 3-ին, երբ ես ծանոթացա ՀՔԾ հաղորդագրությանը, հիշում եմ, որ ինձ բռնեցի մտքի վրա, որ ծանոթ տեքստ եմ կարդում։ Բացեցի Տեր-Պետրոսյանի ելույթները 2008 թվականի մայիսին և տեսա բացարձակ նույն ձևակերպումները։ Կարող եք բացել կարդալ ու տեսնել, թե որտեղից է օգտվել մեր ՀՔԾ-ն։ Կամ այնպես տարված եղել այդ փիլիսոփայությամբ, որ բառերն ինքնաբերաբար այդպես դասավորվել են»,-ասաց Սողոմոնյանը։

Նա համոզված է, նաև պարզ է համարում, որ Ռոբերտ Քոչարյանի նկատմամբ հարուցված քրեական գործը հեռանկար չունի։

«Պարզ է նաև, որ Ռոբերտ Քոչարյանն ազատ է արձակվելու և արդարացվելու է։ Որ մենք որպես պետություն բազմաթիվ հարվածներ ստացանք, դա էլ է պարզ։ Չի կարող նախկին նախագահի ապօրինի հետապնդումը անհետևանք մնալ երկրի համար։ Դա բացառված է։ Տեսնում ենք Վենետիկի հանձնաժողովի եզրակացությունը, ունեցել ենք ՌԴ արտգործնախարարության հայտարարությունը։ Ունենալու ենք ՄԻԵԴ վճիռները, չեմ կասկածում, որ դրանք լինելու են Ռոբերտ Քոչարյանի օգտին։ Չեմ կասկածում, որ այս ամենը հաղթահարելու ենք, իհարկե կորուստներով։ Կորուստներից չեմ կարող չնշել բարոյական կողմը, որտեղ մենք փաստորեն պետք է խոստովանենք, որ ապօրինի կալանքի տակ է գտնվում մարդ, ով ղեկավարել է Ղարաբաղը պատերազմի տարիներին և որտեղ հաղթանակ է տարել։ Մենք մոռանում ենք, որ կալանքի տակ է այն մարդը, ով ղեկավարել է Հայաստանն ու աննախադեպ տնտեսական հաջողություն է գրանցել։ Սա նաև վատ ազդեցություն է ունենալու սերունդների վրա, բայց դե ինչ եղել- եղել է, չենք կարող փոխել։ Միակ բանը, որ կարող ենք փոխել, ապօրինի հետապնդման շուտափույթ դադարեցումն է։ Ես կարծում եմ, որ իշխանության գործելաոճը՝ միչև վերջ տանելու ու նոր կորուստներ ունենալու, այս դեպքում պետք է վերանայվի»,-ասաց Ռոբերտ Քոչարյանի գրասենյակի ղեկավարը։