Ձեր վստահելի աղբյուրը

Աժ նախկին պատգամավոր, գեներալ Մանվել Գրիգորյանին պատկանող «Արա և Այծեմնիկ» ԲԲԸ-ի շարժական և անշարժ գույքերի վրա դրված արգելանքը վերացվում է։ Այս մասին դատարանում հայտարարեց դատավոր Մնացական Մարտիրոսյանը։

Հիշեցնենք, որ ավելի վաղ նա հայտարարել էր, որ դատարան է դիմել Պետական եկամուտների կոմիտեն գրություն՝ խնդրելով Մանվել Գրիգորյանի գույքերից՝ «Արա և Այծեմնիկ» ԲԲԸճի վրա դրված կալանքը վերացնել, հնարավորություն տալ, որպեսզի ՊԵԿ-ն իրացում կատարի, վաճառի՝  հարկային 1 միլիարդ դրամ պարտավորությունը վճարելու համար։

Մ. Մարտիրոսյանն ասաց, որ միաժամանակ  տեղեկացնեն Պետական եկամուտների կոմիտեին, որ եթե նշված գույքի իրացման արդյունքում ստացված գումարը գերազանցի 1 միլիարդ 200 միլիոնը դրամը, ապա այդ մասին տեղեկացնեն դատարանին, որպեսզի մնացած մասի վրա արգելանք դնելու հարցը լուծվի։

Այնուհետև միջնորդությամբ հանդես եկավ պաշտպանական կողմը։ Պաշտպաններից Լևոն Բաղդասարյանն ասաց, որ միջնորդում են գրավի դիմաց ազատ արձակել Մանվել Գրիգորյանին։ Նա նշեց, որ Մ. Գրիգորյանի առողջական վիճակը վատ է, արհեստական շնչառության տակ է, ոտքերը այտուցված են, մինչև 90 տոկոս անզգայացած են, տևական ժամանակ է բժիշկներն արգելում են մասնակցել դատական նիստին։ 

«Նման հիվանդությունների առկայության պայմաններում շարունակում է  մնալ կալանքի տակ, ինչը խոչընդոտում է արդյունավետ բուժմանը։ Մանվել Գրիգորյանի հիվանդությունները գրանցում են բացական դինամիկա»,- հայտարարեց պաշտպանը։

Ա. Մկրտչյանն ասաց, որ միջնորդում են փոխել Մ. Գրիգորյանի  խափանման միջոց կալանավորումը, որպես գրավ առաջարկում են մինչև 25 միլիոն դրամ։ 

Դատախազը հայտնեց, որ ներկայացված փաստարկները միջնորդությունը բավարարելու համար հիմնավոր չեն, միջնորդությունը գրավով փոխարինելու համար փաստարկված չէ։

«Մանվել Գրիգորյանը տևական ժամանակ ստացիոնալ բուժման մեջ է գտնվում։ Ըստ պաշտպանական կողմից ներկայացված բժշկական փաստաթղթերը, այս պահին, իրենց մեկնաբանմամբ,  վկայում են, որ Մանվել Գրիգորյանը պետք է մնա «Նաիրի» ԲԿ-ում բուժումը շարունակեու համար, հետևաբար խափանման միջոցը փոխելու պայմաններում կրկին պետք է գտնվի «Նաիրի» ԲԿ-ում։ Այս ամենը հաշվի առնելով, միջնորդության մեջ ներկայացված հանգամանքները չփաստարկված լինելով, միջնորդությունը ենթակա է մերժման»,- ասաց դատախազը։  

Դատարանը հեռացել է խորհրդակացական սենյակ որոշում կայացնելու։ Այն կհրապարակվի այսօր։ 

Մանվել Գրիգորյանին մեղադրանք է առաջադրվել այն բանի համար, որ նա ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաև կատարել է տարբեր տեսակի հափշտակություններ։  Մ.Գրիգորյանը  կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել է։ Պաշտպանները  մի քանի անգամ դիմել են խափանման միջոց կալանքը գրավով փոխելու միջնորդություններով, սակայն մերժվել են։