Բաբկեն Պիպոյան. Աղբահանության վիճակն ավելի վատ է լինելու, Մհեր Գրիգորյանի երդումը վկա
Երևան քաղաքի իշխանությունները մեղադրում են աղբահանություն իրականացնող ընկերությանը, ընկերությունը՝ քաղաքապետարանին պայմանագրով նախատեսված պահանջները չկատարելու, պայմանավորվածությունները խախտելու, իրար ընդառաջ չգնալու համար։ Իրար նոր պայմաններ են առաջադրում, սպառնալիքներ հնչեցնում, իսկ քաղաքացիներին հորդորում մի քիչ էլ սպասել ու դիմանալ, շնչել աղբահոտն ու աչք փակել ողջ քաղաքում առկա աղբի կույտերի վրա։
«Իրազեկ և պաշտպանված սպառող» ՀԿ-ի նախագահ Բաբկեն Պիպոյանը Panorama.am-ի հետ զրույցում, անդրադառնալով ստեղծված իրավիճակին, ասաց՝ ցավալի է, որ տուժում է քաղաքացին, և ավելի ցավալի է, որ քաղաքացին դեռ ավելի շատ ու երկար է տուժելու։
Աղբահանության շուրջ ստեղծված իրավիճակը նրան հիշեցրել է «Կարգին հաղորդումից» մի հատվածը՝ երբ վիճող կանայք իրար անվանում են «փչացած, տականք ու բոշա»։
«Այս առիթով խոսելիս, միշտ հիշում եմ կառավարության նիստը, որտեղ փոխվարչապետ Մհեր Գրիգորյանն ասաց. «Պարոն վարչապետ, երդվում եմ, որ ավելի վատ է լինելու»։ Նշեմ, որ պարոն Գրիգորյանը շատ տեղին երդվեց»,-ասաց Բաբկեն Պիպոյանը՝ ավելացնելով, որ այս պահին ավելի մեծ ռիսկային գոտում ենք։
Հիշեցնենք, խոսքն այս տարվա ապրիլի 18-ին կառավարության նիստի մասին է, երբ Երևանի քաղաքապետ Հայկ Մարությանը վարչապետ Նիկոլ Փաշինյանի հրավերով կառավարությունում էր` պարզաբանումներ տալու աղբահանության երկրորդ օպերատորի հարցի հետ կապված:
«Մենք գնեցինք մեքենաներ, հետո էդ մեքենաների բազայի վրա ստեղծելու ենք պետական հիմնարկ, որը աղբահանություն է իրականացնո՞ւմ: Շատ վտանգավոր գաղափար է, հաստատ ավելի վատ է աշխատելու, կարող եմ հենց հիմա երդվել»,- ասել էր փոխվարչապետ Մհեր Գրիգորյանը՝ արձագանքելով Մարությանի ներկայացրածին։
ՀԿ նախագահը մանրամասնում է, ինչքան էլ դժգոհ լինենք «Սանիթեք»-ի աշխատանքից, ուզենանք նրան շուտ լարել երկրից ու ունենալ նորմալ աղբահանություն, պետք է հասկանալ, ոչ հավասարակշռված քայլերի դեպքքում մեծ ռիսկեր կլինեն ու իրավական, տնտեսական վատ հետևանքներ։
«Մենք հայտնվելու ենք պարտվողի դերում։ Ինչո՞ւ, որովհետև եթե ոչ քաղաքակիրթ ու ոչ օրինական կերպով լուծարում ենք պայմանագիրը, «Սանիթեք»-ը սկսում է վարկաբեկել Հայաստանն ու ասել՝ գիտե՞ք այնտեղ օրենքից դուրս են աշխատում։ Դրա արդյունքում ոչ մի նորմալ օպերատոր Հայաստան չի գալու, ինչի հետևանքով մենք մնալու ենք համայնքի սպասարկման հույսին։ Իսկ այն, որ համայնքը վատ է սպասարկելու, երկրորդ կարծիք լինել չի կարող, Մհեր Գրիգորյանի երդումը վկա»,-նշում է նա։
Պիպոյանն ընդգծում է՝ քաղաքային իշխանությունները պետք է հասկանային մի բան, որ իրենք բիզնեսմենից լավ չեն կարողանալու կառավարել։
«Դրա վառ ապացույցն այն է, որ «Սանիթեք»-ը վերջին երկու տարիներին իսկապես շատ վատ է աշխատում, բայց երբ ընկերությունը նոր էր եկել, մենք շատ ուրախ էինք նրա մուտքով։ Երբևէ մեր ժողովուրդը չաշխատող, լոդր չի եղել։ «Սանիթեք»-ը կարողացել է իր համար գտնել վարորդներ, բանվորներ, իր աշխատանքը սկզբում կազմակերպել է շատ լավ։ Երևանի քաղաքապետարանը՝ որպես օպերատոր առաջին իսկ օրվանից պարզ դարձավ, որ աշխատող գտնելու հարցում ունի խնդիր։ Նա սահմանել է «Սանիթեք»-ից բարձր աշխատավարձ, բայց վարորդներ ու բանավորներ չի կարողանում գտնել։ Սա արդեն վատ է»,-ասաց նա։
Նա նշում է, որ քաղաքապետարանի առաջին գործը պետք է լիներ երկրորդ օպերատորի ներգրավումը, ունենային ֆինանսական մոդել, կառավարման մեխանիզմներ։
«Միայն այն, որ մինչև այս պահը քաղաքային իշխանությունները չեն տվել ֆինանսական մոդելը, պայմանական, թե որքան է լինելու ծախսը ամորտիզացիայի, պատվիրակված ծառայությունների դեպքում: Երբ այդ համակարգային լուծումները չեն տրվում, գալիս են սիրողական լուծումներ։ «Կամազ»-ների գնումը դրա վառ օրինակն է։ Նաև այն փաստը, որ այդ մեքենաները քաղաքապետարանը գնել է ավելի թանկ, քան եթե մենք այն գնեինք որպես մասնավոր անձ։ Սա արդեն նշանակում է, որ քաղաքը՝ որպես կառավարիչ լավը չի։ Սրա միակ հակափասարակն այն է, որ մի անգամ տվել են մասնավորին ու տեսել արդյունքը։ Մինչդեռ դա պայմանագրով կարգավորվող հարց է, եթե չի կատարում պարտավորությունները, պետք է փոխհատուցել այնքան, մինչև նոր օպերատորի գալը»,-ասաց Պիպոյանը։
Նա խորհուրդ է տալիս համեմատել քաղաքապետարանի բերած ու «Սանիթեք» ընկերությանը պատկանող մեքենաները։
«Սա ակնհայտ է։ Հիմա երկու կողմը մեղադրում են իրար, բայց երկուսն էլ իրենց ասելիքն ու անելիքը չեն արել։ Ի վերջո, քաղաքային իշխանությունը մինչ օրս չի տվել հարցի պատասխանը, գնի ավելացման առաջարկը տրամաբանվա՞ծ է, թե՞ ոչ։ Կամ ասուլիսից հետո, քաղաքապետարանը հրապարակեց պայմանգրից հատված, որ «Սանիթեք»-ը պետք է բերեր մետաղական աղբամաններ ու չի բերել։ Հիմա հարց է առաջանում, այս ընթացքում, երբ իրենք են եղել քաղաքային իշխանություն, «Սանիթեք»-ը նման աղբամաններ բերե՞լ է, թե՞ ոչ, կամ ի՞նչ աղբամաններ է բերել, կամ նման պահանջ ներկայացվե՞լ է ընկերությանը։ Սա սիրողական մակարադակ է, որը չի կարելի»,-նշում է Պիպոյանը։
Լրահոս
Տեսանյութեր
Ուղեվարձերի գումարի ավելացման վերաբերյալ քաղաքապետարանի հրապարակած թվերը ծիծաղելի են ու ամոթալի. Բաբկեն Պիպոյան
