Ձեր վստահելի աղբյուրը

«Անվտանգության տեսանկյունից, բնականաբար,  լավ կլիներ, որ այդ փաստաթղթերը չհայտնվեին BBC-ի մոտ, բայց եթե հայտնվել են, արդեն քննչական մարմինների գործառույթն է դրանով զբաղվելը»,- այս մասին այսօր կառավարության նիստից հետո լրագրողների հետ զրույցում ասաց Անվտանգության խորհրդի քարտուղար Արմեն Գրիգորյանն՝ անդրադառնալով BBC-ի ռուսական ծառայության կողմից Մարտի 1-ի գործի հետ կապված հրապարակմանը:

Հարցին՝ անվտանգության տեսանկյունից սա սպառնալիք չէ՞, ԱԽ քարտուղարը նշեց, որ աշխարհում չկա մի երկիր, որտեղ լուծված է այդ հարցը: «Գաղտնիության հարցի հետ առնչվում են բոլորը: «Վիկիլիքս»-ը դրա վառ օրինակն է, որ նույնիսկ աշխարհի ամենահզոր երկրներից մեկի՝ Միացյալ նահանգների ամբողջ գաղտնի փաստաթղթերը հայտնվել են լրատվամիջոցներում: Մենք ապահովագրված չենք դրանից,  բայց աշխատում ենք, որպեսզի մինիմումի հասցնենք այդ վտանգը»,- ընդգծեց Արմեն Գրիգորյանը:

Դիտարկմանը՝ չի բացառում, որ Հայաստանի անվտանգության հետ կապված փաստաթղթերը  կարող են հայտնվել նույնիսկ թշնամական երկրներում, ԱԽ քարտուղարն ասաց՝ ամեն ինչ անում են, որ արտահոսք չլինի և դրա համար կան մեխանիզմներ, կա գաղտնիության մասին օրենք:

Հարցին՝ երաշխավորո՞ւմ է, որ այդ փաստաթղթերը BBC-ի ձեռքում չեն հայտնվել իշխանության ներկայացուցիչների կամ պաշտոնատար անձանց աջակցությամբ, Արմեն Գրիգորյանը  նշեց, որ դրա համար պատասխանատու մարմինը պետք է հետաքննություն իրականացնի՝  հասկանալու համար, թե ինչ պատճառով են այդ փաստաթղթերը հայտնվել տվյալ լրատվամիջոցի ձեռքում:

Նրա խոսքով՝ այդ փաստը մտահոգում է ոչ միայն իրեն, այլև անվտանգության համար ցանկացած պատասխանատուի համար։ «Մեզ համար շատ կարևոր է, որ գաղտնի ինֆորմացիայի որևէ արտահոսք չլինի, քանի որ գաղտնիությունը նշանակում է նաև ապահովվածություն, անվտանգություն»,- ընդգծեց նա: