Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի աջակիցները բողոքի ակցիա են անցկացնում Բարձրագույն դատական խորհրդի շենքի դիմաց։

Հավաքվածները խնդրում և հորդորում են ԲԴԽ նախագահին իջնել իրենց մոտ, զրուցել և հասկանալ, թե պատճառը որն է, որ ՀՀ իշխանությունները փորձում են ամբողջ դատական համակարգի նկատմամբ կիրառել օրենքից դուրս մեթոդներ և գործիքակազմ, որպեսզի ճնշեն դատական համակարգին՝ նրանց կողմից բնականոն գործընթացը կազմակերպելու։

«Խորհուրդը կոչված է հենց դրան, որպեսզի ՀՀ-ում երաշխավորեն դատական համակարգի աշխատանքը՝ օրենքին ու Սահմանադրությանը համապատասխան»,- նշեց ակցիայի մասնակիցներից մեկը։

Ինչ վերաբերում է Ռոբերտ Քոչարյանի գործին՝ նա ասաց. «Նախագահ Քոչարյանի գործով արդեն մեկ տարի է տիրում է «բեսպրեդել», չի ձևավորվում դատարան, որպեսզի քննվի նրա կալանքի հարցը»։

Ակցիայի մասնակիցները նաև նշեցին, որ արդեն երրորդ օրն է իրենք իրականացնում են այս ակցիան, բայց «ձայն բարբառոյ հանապատի», քար լռություն է տիրում, իրենք արձագանք չեն ստացել։

«Ամբողջ խնդիրն այն է, որ ՀՀ-ում արդարադատությունը, մեղմ ասած, կաղում է, և ի դեմս նախագահ Քոչարյանի և մյուսների նկատմամբ քրեական գործով, առհասարակ գլոբալ առումով մարդու իրավունքները ոտնահարված են։ ԲԴԽ-ն պետք է արձանագրի խախտումները, ստեղծի անաչառ դատարան և դարատանի նախագահ նշանակած Արթուր Մկրտչյանին փորձեն հորդորել, խնդրել կամ այլ լծակներ օգտագործել, և միացնի այդ համակարգիչը, որը կընտրի դատավոր»,- նշեց Վահե Եփրիկյանը։

Այնուհետև ակցիայի կազմակերպիչները տեղեկացրեցին՝ ԲԴԽ-ից իրենց ասել են, որ իրենց մոտ խորհրդակցություն է և այս պահին հնարավորություն չունեն իրենց մոտ իջնելու։

Իսկ թե երբ կավարտվի խորհրդակցությունը, նրանց հստակ պատասխան չեն տվել, սակայն ակցայի մասնակիցները մտադիր են մինչև վերջ սպասել։