Ձեր վստահելի աղբյուրը

«Հրապարակ» թերթը գրում է. «ՀՀ ոստիկանապետ Վալերի Օսիպյանը 3-4 օր առաջ պաշտոնից ազատել Ճանապարհային ոստիկանության հաշվառման-քննական ստորաբաժանման ղեկավար, «հայերեն» ասած՝ ՄՌՈՒ-ի պետ Արմեն Դավթյանին, թեև ձևակերպվել է՝ «իր դիմումի» համաձայն։ Դավթյանի հետ մեզ չհաջողվեց խոսել, երկրում չէ։ Իսկ ՃՈ պետի տեղակալ Արթուր Տոնոյանը, ով համակարգում է այս ոլորտը, մեր հարցին, թե որն է Դավթյանի ազատման պատճառը, թերացե՞լ է աշխատանքում, ասաց․ «Չէ, չի թերացել, իր դիմումի հիման վրա ազատվել է աշխատանքից»։ Իսկ կարո՞ղ է ասել են, որ դիմում գրի։ Տոնոյանը դժվարացավ պատասխանել։

Մեզ հասած տեղեկություններով՝ Արմեն Դավթյանի ազատման պատճառն այն է, որ նա իր երկու կոլեգաների՝ Սուրեն Խուդոյանի և Լևոն Բեգոյանի հետ այցելել է ՀՀ նախկին ոստիկանապետ Վլադիմիր Գասպարյանին, Սևանի ափին գտնվող նրա առանձնատանը քեֆ են արել, շփվել, ինչը նոր իշխանություններին դուր չի եկել, և հենց դա էլ դարձել է նրանց՝ աշխատանքից ազատման, ավելի պարզ ասած՝ «հաշվեհարդարի» պատճառը։

Արդյունքում «իր դիմումի հիման վրա» աշխատանքից ազատվել է Արմեն Դավթյանը, «նույն հիմքով»՝ նաև ոստիկանության ՊՊԳՎ կարևորագույն օբյեկտների և հիմնարկ-ձեռնարկությունների պահպանության գնդի հրամանատար Սուրեն Խուդոյանը։ Ոստիկանության լրատվականից մեզ ասացին, որ Խուդոյանն աշխատանքից ազատվել է օգոստոսի 13-ին՝ «դիմում է գրել և երկարամյա ծառայությամբ գնացել է թոշակի»։

Իսկ Վովա Գասպարյանին այցելած եռյակի մյուս անդամին՝ Լևոն Բեգոյանին, որը Երևան քաղաքի վարչության «Զվարթնոց» օդանավակայանի գծային բաժնի պետն էր, ազատել էին մոտ 2 շաբաթ առաջ՝ օգոստոսի 7-ին։ Մենք չկարողացանք պարզել՝ Վալերի Օսիպյա՞նն է հաշվեհարդար տեսել այս անձանց հետ, թե՞ սա եղել է Նիկոլ Փաշինյանի գիտությամբ»:

Մանրամասները թերթի այսօրվա համարում