Ձեր վստահելի աղբյուրը

 Արարատի մարզպետի նախկին տեղակալ Հայրապետ Բաբայանին մեղադրանք է առաջադրվել պաշտոնեական կեղծիք կատարելուն դրդելու համար։ Այս մասին գրում է «Փաստինֆո»-ն։ 

Ըստ աղբյուրի, բանն այն է, որ նա, աշխատելով որպեսԱրարատի մարզպետի տեղակալի պաշտոնում, Շվեյցարիայի համադաշնությունում բնակվող իր քրոջը Հայաստանի Հանրապետություն վերադառնալու հնարավորություն ընձեռելու նպատակով օգտագործելով իր պաշտոնեական դիրքը եւ 2018թ. սեպտեմբերի 26-ին իր աշխատասենյակ է հրավիրել «Ազատավան ԱԱՊԿ» ՊՈԱԿ-ի տնօրեն Ա.Կարապետյանին և հորդորելու եղանակով դրդել է տալ մեծահասակի ամբուլատոր բժշկական քարտից քաղվածք, թե իբր Հայաստանի Հանրապետությունում բնակվող իր մյուս քույրն ունի առողջական խնդիրներ:

Նախնական քննության վարկածով՝ մարզպետի տեղակալի դրդմամբ և անձնական անձնական այլ դրդումներով ՝ Կարապետյանը քրոջ վերաբերյալ կազմել է «Կրծքավանդակի ուռուցք 4-րդ աստիճանի, ծանր ընթացքով որովայնի օրգանների մետաստատիկ ախտահարումով» ախտորոշմամբ ակնհայտ կեղծ տեղեկություններ պարունակող պաշտոնական փաստաթուղթ հանդիսացող մեծահասակի ամբուլատոր բժշկական քարտից քաղվածք և այն հանձնել Բաբայանին: Վերջինս այդ փաստաթուղթը ուղարկել է Շվեյցարիայի Համադաշնության դեսպանություն՝ այդ կերպ օգտագործելով այն:

Բաբայանին մեղադրանք է առաջադրվել ՀՀ քրեական օրենսգրքի 38-314-րդ հոդվածի 1-ին մասով, այն է՝ պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով՝ պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելուն դրդելը, ինչպես նաև 325-րդ հոդվածի 1-ին մասով, այն է՝  իրավունք վերապահող կամ պատասխանատվությունից ազատող վկայական կամ պաշտոնական այլ փաստաթուղթ կեղծելը՝ կեղծողի կողմից անձամբ կամ այլ անձի կողմից դրանք օգտագործելու կամ իրացնելու նպատակով։

Դատական-տեղեկատվական  համակարգից տեղեկացանք, որ գործը դատարան է մուտք եղել  օգոստոսի 26-ին, և մակագրվել է Արարատի մարզի ընդհանուր իրավասության դատարանի դատավոր Հարություն Պետրոսյանին։

Նրա նկատմամբ որպես խափանման միջոց է ընտրվել ստորագրությունը՝ չհեռանալու մասին։ Բաբայանն այդ պաշտոնից ազատվել էր 2018 թվականի հոկտեմբերին։