Ձեր վստահելի աղբյուրը

ԱԺ «Իմ քայլը» խմբակցության ներսում Ամուլսարի հարցում կա այլակարծություն։ Այս մասին այսօր խմբակցության նիստից հետո լրագրողների հեզ զրույցում ասաց «Իմ քայլը» խմբակցության պատգամավոր Սոֆյա Հովսեփյանը։

Հարցին՝ արդյոք խմբակցության ներսում Ամուլսարի հարցով տարաձայնությունների կան, պատգամավորը  նշեց, որ դա տարաձայնություն չէ, այլակարծություն է. «Մի մասը գտնում է, որ Ամուլսարը չպետք է բացվի, մի մասն էլ կողմ է»:

Նա նաև նշեց, որ նիստի ժամանակ Ամուլսարի հարցով կարծիքներ եղել են, բայց զարգացումներ չկան։ 

«Մնացել ենք այն նույն մոտեցմանը, որ այս պահին պետք է սպասենք կառավարության քայլերին, Շրջակա միջավայրի նախարարության պատասխանին»։

Հարցին՝ կկանգնի՞ ակտիվիստների կողքին, իսկ եթե պետք լինի, ապա մանդատից կհրաժարվի, պատգամավորը պատասխանեց. «Ես նման բան չեմ պնդել, որ դրա համար մանդատը վայր կդնեմ, բայց եթե ակտիվիստների և ոստիկանների միջև կանգնելու կարիք լինի, առաջին կանգնողներից կլինեմ, բայց մանդատը վայր դնելու մասին թող խոսք անգամ չլինի»։

Լրագրողները հետաքրքրվեցին, թե խմբակցության ներսում չի՞ խրախուսվում Ամուլսարի մասին հրապարակային խոսել, քանի որ շատերը խուսափում են իրենց դիրքորոշումը հայտնել, Սոֆյա Հովսեփյանը պատասխանեց. «Նման հրահանգ կամ առաջարկ չի եղել: Ամեն մեկն է որոշում՝ խոսել կամ լռել»:

Ինչ վերաբերում է հանքի շահագործման վերաբերյալ իր դիրքորոշմանը, պատգամավորն ասաց, որ եթե կա ռիսկ թեկուզ մեկ անձի թունավորման, ապա իր դիրքորոշումը չի փոխվելու։ «Եթե 0.01 տոկոս ռիսկ կա, թեկուզ երկրաշարժի դեպքում, քամու դեպքում, կամ նման ինչ-որ բան, իմ դիրքորոշումը հստակ է՝ եթե կա գոնե մեկ անձի թունավորման ռիսկ, իմ դիրքորոշումը չի փոխվելու»,-նշեց նա։