Էդգար Ղազարյան. «Լիդիան Արամենիա»-ն պաշտոնապես հաստատում է հակառակը։
Վայոց Ձորի նախկին մարզպետ, ՍԴ աշխատակազմի ղեկավար Էդգար Ղազարյանն անդրադարձել է «Լիդիան» ընկերության հայտարարությանը։ Ընկերությունը Ղազարյանին մեղադրել էր սուտ խոսելու համար։
Նախկին մարզպետը ֆեյսբուքյան իր էջում գրել է.
«Լիդիան Արմենիա ընկերությունը, հավանաբար, հանրային ուշադրությանն արժանանալու համար, պարզվում է որոշել է մի մարքեթինգային հնարք գործադրել՝ իրենց ընկերության Facebook-ի էջում մի հայտարարություն տարածելով իմ լուսանկարով և շահարկելով իմ անունը (հատկանշական է, որ այն իրենց էջի ամենից շատ ուշադրության արժանացած գրառումներից մեկն է)։ Այս պարագայում ես որոշեցի խախտել հիմարություններին չարձագանքելու իմ սկզբունքը, քանի որ վերնագրին և բովանդակությանը չհամապատասխանող այդ տեքստի մեջ, այնուամենայնիվ, նկատելի են մի շարք ուշագրավ փաստեր։
Նախ, Լիդիանը նշում է, որ «․․․այդ տարիներին (խոսելով իմ մարզպետ աշխատած ժամանակաշրջանի մասին․ խմբ․ իմ կողմից) Ընկերության համար արհեստական խոչընդոտներ ստեղծելու նպատակով 2 անգամ կատարվեցին իրավական ակտերի փոփոխություններ, որոնց պայմաններում Ընկերությունը ստիպված էր կատարել նախագծային փոփոխություններ և ամեն անգամ իրականացնել նոր ՇՄԱԳ-ներ»։ Մեկ ուրիշ տեղում գրում են․
«․․․Ընկերությունը նոր ՇՄԱԳ է իրականացրել։ Օրենքի տառից չշեղվելու նպատակով վերջին այսպիսի ՇՄԱԳ-ը իրականացվել է 2016 թվականին, որից հետո Ընկերությունը որևէ նախագծային փոփոխություն չի կատարել»։ Այսինքն` շատ պարզ և պաշտոնապես հաստատում են այն տեղեկությունը, ինչը ես ներկայացրել եմ վարչապետին, 2019 թվականի օգոստոսի 23-ին Ջերմուկում տեղի ունեցած կարճատև զրույցի ընթացքում։ Հետաքրքիր է հասկանալ, թե այստեղ սուտը որտեղ կարող է լինել։ Ուշագրավ է այն, որ վարչապետ Նիկոլ Փաշինյանը, մինչ Ջերմուկ այցելելը, մի շարք խորհրդակցություններ ու հանդիպումներ է անցկացրել, այդ թվում Լիդիանի ներկայացուցիչների մասնակցությամբ, որի ժամանակ պետության ղեկավարին չի ներկայացվել ընկերության գործունեության պատմության այդ ուշագրավ դրվագները, ինչի մասին վարչապետը տեղեկացվել է միայն Ջերմուկում իմ կողմից և ակնհայտորեն ցույց տվել, իր մտահոգություններն ու հետաքրքրվածությունն այդ առթիվ։
Հայտարարության մյուս ուշագրավ դրվագը կայանում է դրանում, որ որոշ մարդիկ և լրատվամիջոցներ, ինձ փորձում են մեղադրել մարզպետի պաշտոնում աշխատած տարիներին Ամուլսարի հանքավայրի շահագործման հարցում, այսպես կոչված, հանդուրժողական դիրքորոշման համար։ Ընկերությունը պաշտոնապես հաստատում է հակառակը։
Մեջբերում․ «Ընդ որում, այն փաստը, որ հենց 2012-2013 թվականներին գոյություն չունեցող, հորինված բնապահպանական նկատառումներով կատարվել են իրավական ակտերի նշված փոփոխությունները՝ Լիդիանի համար լրացուցիչ խնդիրներ ստեղծելով, վկայում է այն մասին, որ Ընկերությունը չի ենթարկվել խաղի ընդունված կանոններին և ստեղծված արհեստական խոչընդոտների արդյունքում ստիպված է եղել ամեն անգամ լրացուցիչ գումարներ և ժամանակ վատնել։ Լիդիանի առաջ արհեստական խոչընդոտներ են ստեղծվել բոլոր ժամանակներում»։ Սա կարծում եմ բավարար է նմանօրինակ բոլոր կասկածները փարատելու համար, և լավագույն վկայությունն է բոլոր ժամանակներում մեր սկզբունքային և շահագրգիռ դիրքորոշումների արտահայտման մասին։
Ինչ վերաբերում է պետության կողմից ներկայացված պահանջներին, ապա դրանց հիմնավորվածության լավագույն ապացույց այն է, որ ընկերությունը կատարել է դրանց պահանջները և ժամանակին ընդունել դրանց հիմնավորվածությունն ու իրավաչափությունը, հակառակ պարագայում ոչ ոք չէր կարող արգելել նրանց հրաժարվել դրանց կատարումից և օրենսդրությամբ սահմանված կարգով բողոքարկումից (այդ թվում դատական կարգով), ինչն իրենց կողմից չի արվել։
Վերջին կարևոր արձանագրումը, որ կարելի է անել այդ հայտարարությունից այն է, որ Լիդիանը հաստատում է, որ իրենք փաստացի ստիպված են կատարել այս կամ այն բնապահպանական պահանջները, այլ ոչ թե իրենց նախաձեռնությամբ և կամքով, ինչը կասկածի տակ է դնում նրանց, իբրև սոցիալական պատասխանատու ընկերություն լինելու հանգամանքը, որից ազատորեն կարելի հետևություններ անել իրենց այլ գործողությունների և քայլերի մասով։
Հ․Գ․ Ես պատրաստ եմ իմ համեստ գիտելիքներով, փորձառությամբ, փաստարկներով և հիմնավորումներով հնարավորինս զինել օրվա իշխանություններին՝ այդ հարցում լավագույն որոշումները կայացնելու համար»։
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
