Հայաստանի պետական կամերային երգչախումբը Մանսուրյանին նվիրված համերգով հանդես է եկել Արցախում

Մշակույթ 11:30 02/09/2019 Հայաստան

Հայաստանի պետական կամերային երգչախումբը Մանսուրյանին նվիրված համերգով հանդես է եկել Արցախում

«Երևանի օրերը Արցախում» ծրագրի շրջանակում Ստեփանակերտի մշակույթի և երիտասարդության պալատում տեղի է ունեցել Հայաստանի պետական կամերային երգչախմբի համերգը: Այն կրում էր «Հայ դասական պոեզիան Մանսուրյանի երաժշտության մեջ» խորագիրը:

Երգչախումբը հանդես է եկել գեղարվեստական ղեկավար և գլխավոր խմբավար Ռոբերտ Մլքեյանի ղեկավարությամբ:

Երգչախմբից տեղեկացնում են, որ համերգը նվիրված էր կոմպոզիտոր Տիգրան Մանսուրյանի 80-ամյակին, և երեկոյին ներկայացվում էին մեր օրերի դասականի ստեղծագործությունները: Ի դեպ, Մանսուրյանը ևս ներկա էր համերգին:

Միջոցառմանն Արցախի Հանրապետության մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը կոմպոզիտորին է հանձնել պատվոգիր և խորհրդանշական նվեր:

«Ինձ համար մեծ հպարտություն է կրկին լինել Արցախում: Արցախում մենք շատ ենք եղել՝ երգել Գանձասարում, Ամարասում, ինչպես նաև մասնակցել տարբեր փառատոների: Առաջիկայում նախատեսում ենք մի քանի ծրագրեր կյանքի կոչել Արցախում: Պետք է խոստովանեմ, որ այստեղի հանդիսատեսը լուրջ է, գրագետ և սրտաբուխ»,-լրագրողների հետ զրույցում ասել է
Հայաստանի պետական կամերային երգչախմբի գեղարվեստական ղեկավար և գլխավոր դիրիժոր Ռոբերտ Մլքեյանը:

Համերգն անցել է մեծ հաջողությամբ՝ ունկնդրի ջերմ արձագանքի ներքո: Ներկա են եղել պետական այրեր, պատգամավորներ, արվեստի գործիչներ և այլք:

Համերգը կազմակերպվել է Երևանի քաղաքապետարանի, ՀՀ կրթության, գիտության, մշակույթի և սպորտի, ինչպես նաև ԱՀ մշակույթի, երիտասարդության հարցերի և զբոսաշրջության նախարարությունների համատեղ նախաձեռնությամբ:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: