Ձեր վստահելի աղբյուրը

Pink Floyd  ռոք խմբի հիմնադիրներից մեկը՝ Ռոջեր Ուոտերսը, փոքրիկ համերգ է անցկացրել Մեծ Բրիտանիայի ներքին գործերի նախարարության շենքի մոտ ի աջակցություն Wikileaks-ի հիմնադիր Ջուլիան Ասանժի։ Երաժիշտը կոչ է արել հավաքված մարդկանց պահանջել արգելել Ասանժի արտահանձնումը ԱՄՆ-ին, որտեղ նրան սպառնում է  երկար տարիների ազատազրկում։

kulturomania.ru-ն գրում է, որ Ուոտերսը բեմից հիշեցրել է այն մասին, որ ձերբակալության ժամանակ Ասանժը կոչ է արել բրիտանացիներին դիմադրության։ 

«Դիմադրությունը պետք է, որպեսզի կանխվի արտահանձնումը»,- ասել է երաժիշտը։

Ակցիային մասնակցել է Ասանժի եղբայը։ Համերգը մի քանի հարյուր մարդու ուշադրությանն է արժանացել, որոնց քաղաքացիական ակտիվիստները բաժանել են թերթիկներ  ի աջակցություն Ասանժի։

Մեծ Բրիտանիայի ոստիկանությունը ապրիլի 11-ին ձերբակալել է Ջուլիան Ասանժին, որը վեց տարի ապրում էր Մեծ Բրիտանիայում Էկվադորի դեսպանատանը։ 2012-ի ամռանը Ասանժը ապաստան էր խնդրել Էկվադորի ԱԳՆ-ից, որպեսզի խուսափի Շվեդիա արտահանձնումից, որտեղ նա մեղադրվում է սեռական բնույթի հանցագործությունների մեջ, կամ ԱՄՆ, որտեղ նա կարող է բանտարկվել լրտեսության և գաղտնի տեղեկատվության  բացահայտման համար:  Մեծ Բրիտանիայում նա դատապարտվել է 11,5 ամսվա ազատազրկման գրավի դիմաց ազատ արձակվելու պայմանները խախտելու համար։ Վճիռն ընդունվել էր մայիսի 1-ին։