Ձեր վստահելի աղբյուրը

«Կալանավորումը երկրորդ նախագահ Ռոբերտ Քոչարյանի նկատմամբ  իր իրավունքի խախտում է»,- Սահմանադրական դատարանում ՀՀ երկրորդ նախագահ Ռոբերտ Քոչարյանի դիմումի քննությունից և որոշման հրապարկումից հետո հայտարարեց Սահմանադրական դատարանում ՀՀ երկրորդ նախագահ Ռոբերտ Քոչարյանի շահերը ներկայացնող Արամ Վարդևանյանը։

Նա նշեց, որ ՍԴ որոշումը պարտադիր է և դատական մարմինների, և գործադիր իշխանության, և բոլորի համար, ՍԴ որոշումը չկատարելը քրեորեն հետապնդելի արարք է։

Հարցին՝  հիմա ո՞ր ատյանը պետք է վերանայի Ռ. Քոչարյանի խափանման միջոցը, նա պատասխանեց. «Խափանման միջոցը վերանայելու հնարավորությունը  տվյալ դեպքում երկու տեսանկյունից կարող է լինել. առաջին՝ և քրեակատարողական ծառայության կողմից, քանի որ քրեակատարողական ծառայության համար էլ պարտադիր է ՍԴ որոշումը, երկրորդ՝ վարույթ իրականացնող մարմինը, այսօրվա դրությամբ առաջին ատյանի ընդհանուր իրավասության  դատարանի նախագահող Աննա Դանիբեկյանի կողմից»։

Պատասխանելով հարցին՝ այսինքն Ա. Դանիբեկյանը սեպտեմբերի 12-ին պե՞տք է  խափանման միջոցի հարցը քննի  և ազատ արձակի Ռ. Քոչարյանին, Ա. Վարդևանյանն ասաց, որ դրա վերաբերյալ  այլընտրանք չկա, ՍԴ որոշումը ուժի մեջ է մտնում հրապարակման պահից։

«Ցավոք սրտի, մեզ մոտ պրակտիկա չկա, որ նման դեպքերում դատարաններն անհապաղ պետք է նիստ գումարեն, բայց այս դեպքում օբյեկտիվորեն հաշվի առնենք, որ պետք է լինի դատարանի որոշման ամբողջ տեքստը հրապարակված, որի պարագայում կներկայացնենք բոլոր գործողությունները»,- ասաց փաստաբանը։

Նրա խոսքով, մի բան հստակ է, որ  կալանավորման ամեն օրն էլ, հաշվի առնելով  բարձր դատարանի որոշման եզրակափակիչ մասը, իրավունքի խախտում է։

Հարցին, թե Ձեր կողմից վիճարկված երկու հոդվածից 135-րդ (Խափանման միջոց կիրառելու հիմքերը) սահմանադրական է ճանաչվել, մեկը՝ 35-րդ (Քրեական գործի վարույթը կամ քրեական հետապնդումը բացառող հանգամանքներ) հակասահմանադրական, ինչքանո՞վ երկակիությունների  տեղիք կտա,  135-րդ հոդվածի ազդեցությունը ո՞րը կլինի, Ա. Վարդևանյանը պատասխանեց. «Եթե 35-րդ հոդվածը լիներ այնպիսին,  ինչպիսին պետք է լիներ, իհարկե, 135-րդ հոդվածը մեր կողմից չէր վիճարկվի  Սահմանադրական դատարանում։ Եթե 35-րդ հոդվածը լիներ հստակ, 135-րդ հոդվածը խնդիր չէր առաջացնի։ Սկզբից 35-րդ հոդվածն է, հետո 135-րդը, եթե 35 –րդ հոդվածի խնդիրն արձանագրվեց,  135-ն էլ խնդիր չի կարող ունենալ»։

Հարցին՝ գոհացնում է Ձեզ այս որոշոմը, թե ավելիին էինք սպասում, նա նշեց, որ այս փուլում չի կարողանում մեկնաբանել. «Կարող եմ արձանագրել, որ այսքան ամիս, երբ նշվում էր, որ անձնական ազատության իրավունքի տեսանկյունից խնդիր կա, վերջապես արձանագրվեց բարձր դատարանի կողմից։ Այդ առումով չափազանց կարևոր է»։

Լրագրողի հարցին՝ այսինքն մինչև գործով վերջնական դատական ակտ լինի, Ռոբերտ Քոչարյանը  կլինի ազատությա՞ն մեջ, Ա. Վարդևանյանն ասաց, որ որոշմանը ծանոթալուց հետո կարող են ասել, իսկ առանց որոշմանը ծանոթանալու կարող են արձանագրել, որ կալանավորումը երկրորդ նախագահի նկատմամբ, խախել է  նրա անձնական ազատության իրավունքը։