Ձեր վստահելի աղբյուրը

ԲԴԽ նախագահ Ռուբեն Վարդազարյանը համամիտ չէ, որ իր ղեկավարած կառույցը իշխանությունների համար ցանկալի է։

«Ավելին ասեմ, երբ Բարձրագույն դատական խորհուրդում զանազան հարցերի վերաբերյալ քննարկումներ են լինում, ես նման մոտեցում չեմ տեսնում։ Բավականին կառուցողական մոտեցում է։ Գրեթե բոլորիս կարծիքները համընկնում են գրեթե բոլոր սկզբունքային հարցերի շուրջ»,-ասաց նա։

Լրագրողը նկատեց, կա կարծիք որ խորհուրդը ծյունինգ արած է, շարժվում է իշխանությունների կամքով, որպես ապացույց մատնանշում են, որ խորհրդի անդամները չկանգնեցին դատավոր Դավիթ Գրիգորյանի կողքին։  Վարդազարյանը խոստովանեց, ծյունինգ բառն իր համար անհասկանալի է նաև բովանդակային առումով։

«Իսկ թե ինչո՞ւ ԲԴԽ-ն չկանգնեց Դավիթ Գրիգորյանի կողքին, ապա հարցադրումը փոքր ինչ ինձ համար անհասկանալի է։ Բարձրագույն դատական խորհուրդն օժտված է ապահովել դատավորի անկախությունը։ Դատավորի կողքը կանգնել, հասկանում եմ պաշտպանելը, կամ ամեն գնով պաշտպանելը նկատի ունեք, այդպես չէ։ Ավելին ասեմ, բավարար հիմքեր են ներկայացվել խորհրդին, և ԲԴԽ-ն ընդամենը  թույլատրել է նախաքննություն իրականացնող մարմնին քրեական հետապնդում իրականացնել»,-ասաց նա՝ հիշեցնելով, որ դատավորի լիազորությունները կասեցված են։

Նրա խոսքով, դատավորի անկախությունն ապահովելը  չի նշանակում ամեն գնով թույլ չտալ, որ դատավորի նկատմամբ քրեական հետապնդում իրականացվի։

«Այո, ես գտնում եմ, եթե ԲԴԽ-ն գտներ, որ դրանով ոտնահարվում է դատական իշխանության կամ կոնկրետ դատավորի անկախությունը, ապա այլ որոշում կկայացներ։ ԲԴԽ-ն գտել է, որ նախաքննության մարմնի կողմից ներկայացված հիմնավորումները բավարար էին, որ թույլատրվեր քրեական հետապնդումը։ Այս փուլում Բարձրագույն դատական խորհուրդը գտել է, որ կասկածը հիմնավոր է, որ նման թույլտվություն տա»,-ասաց նա՝ ավելացնելով, եթե տասը-քսան դատավորի վերաբերյալ նման հիմքեր ներկայացվեն, ապա ԲԴԽ-ն նույն որոշումը կկայացնի։

Հիշեցնենք, որ հուլիսի 26-ին Բարձրագույն դատական խորհուրդ է ներկայացվել միջնորդություն՝ երեք դրվագով ՀՀ քրեական օրենսգրքի 314 հոդվածի 1-ին մասի (պաշտոնեական կեղծիք) հատկանիշներով քննվող քրեական գործով դատավոր Դավիթ Գրիգորյանի նկատմամբ քրեական հետապնդում հարուցելու համաձայնություն տալու մասին։ «ԲԴԽ-ն,  քննելով միջնորդությունը, լսելով ինչպես ՀՀ գլխավոր դատախազի տեղակալ Ա․ Հարությունյանին, այնպես էլ դատավոր Դ․ Գրիգորյանին, որոշել է ներկայացված միջնորդությունը երկու դրվագներով բավարարել։ Դրանից հետո օրենքի ուժով կասեցվել են նաև դատավոր Դավիթ Գրիգորյանի լիազորությունները։

Նշենք, որ դատավոր Դավիթ Գրիգորյանին որոշմամբ էր փոխվել ՀՀ երկրորդ նախագահ Ռոբերտ Քոչարյանի՝ խափանման միջոցը, կալանքի փոխարեն ընտրվել էր անձնական երաշխավորությունը։

100-ից ավելի փաստաբաններ պատրաստակամություն էին հայտնել ստանձնելու դատավոր Դավիթ Գրիգորյանի պաշտպանությունը։