Ձեր վստահելի աղբյուրը

2008 թվականի մարտի 1-2-ը Երևան քաղաքում տեղի ունեցած իրադարձությունների ժամանակ տուժած անձանց աջակցության տրամադրման  նպատակով կառավարության պահուստային ֆոնդից կհատկացվի 720 միլիոն դրամ: Այս մասին որոշումն ընդունվեց գործադիրի այսօրվա նիստում։

Աջակցությունը տրամադրվում է միանվագ դրամական օգնության ձևով՝ հետևյալ չափերով՝

1) ստացած վնասվածքի պատճառով զոհված (մահացած) անձի` Հայաստանի Հանրապետության քրեական դատավարության օրենսգրքով նախատեսված կարգով իրավահաջորդի կարգավիճակ ունեցող անձին՝ 30 մլն դրամ.

2) առողջությանը ծանր վնաս հասցված անձին՝ 15 մլն դրամ.

3) առողջությանը միջին ծանրության վնաս հասցված անձին՝ 5 մլն դրամ:

ՀՀ հատուկ քննչական ծառայությունից ստացված տվյալներով, 2008 թվականի մարտի 1-2-ը Երևան քաղաքում տեղի ունեցած իրադարձությունների ժամանակ  զոհվել է 10, առողջությանը ծանր վնաս է հասցվել 10 և  միջին ծանրության վնաս ՝ 54 անձի:

Վարչապետ Նիկոլ Փաշինյանը նշեց, որ սա ոչ թե փոխհատուցում է, այլ՝ աջակցություն։

«Իմ դիրքորոշումն այն է, որ հայտնի հանգամանքների բերումով մենք փոխհատուցման հարցի վերաբերյալ որոշումներ պետք է կայացնենք ՄԻԵԴ-ի կողմից կայացրած որոշումների հիման վրա: Այս հարցում շատ կարևոր է, որ որոշումները կայացվեն մաքսիմալ օբյեկտիվ: Բայց քանի որ մենք չգիտենք, թե ՄԻԵԴ-ը երբ կկայացնի որոշումներ այս հարցերով, չստացվի այնպես, որ մեր կառավարությունը որևէ միջոց չի ձեռնարկում մարտի 1-ի զոհերին և տուժածներին աջակցություն ցույց տալու համար, մենք այս որոշումը կայացնում ենք ԱԺ ընդունած օրենքի հիման վրա։ Վերջարդյունքում հասցված վնասի փոխհատուցման հարցը կփակենք ՄԻԵԴ-ի որոշումների հիման վրա: Ես նկատի ունեմ փոխհատուցման չափը, որ այդ իրադարձության մեջ ներգրավված անձինք չորոշեն չափը, քանի որ կարող են դրանք սուբյեկտիվ լինել։ Սա, ըստ էության, միջանկյալ որոշում է»,- ընդգծեց վարչապետը։

Արդարադատության նախարար Ռուստամ Բադասյանն էլ նշեց, որ ՄԻԵԴ-ը որոշում կայացնելիս կարող է հաշվի առնել նաև ՀՀ կառավարության կայացրած այս որոշումը: