Ձեր վստահելի աղբյուրը

Սեպտեմբերի 5-ին «Մաեստրո Մանսուրյան» համերգաշարի շրջանակներում Հայաստանի պետական սիմֆոնիկ նվագախումբը՝ գեղարվեստական ղեկավար և գլխավոր դիրիժոր Սերգեյ Սմբատյանի ղեկավարությամբ ներկայացրել է Տիգրան Մանսուրյանի սիմֆոնիկ ստեղծագործությունները։ Որպես մենակատարներ հանդես է եկել  թավջութակահար Անյա Լեխները, ջութակահար Անուշ Նիկողոսյանը, դաշնակահար Հայկ Մելիքյանը։ Այս մասին հայտնում են սիմֆոնիկ նվագախմբի մամուլի ծառայությունից։ 

Անյա Լեխները նշել  է, որ ինքը մաեստրո Մանսուրյանի երաժշտության հետ շփվում է 2003 թվականից՝ տարբեր անսամբլների, նվագախմբերի հետ կատարելով նրա ստեղծագործությունները՝ գրված թավջութակի համար։

«Մանսուրյանական արվեստին ծանոթանալու առաջին իսկ պահից նրա երաժշտությունը հուզել է ինձ, եղել հոգեհարազատ, և ես կարծում եմ, որ նա մեր ժամանակների ամենակարևոր կոմպոզիտորներից է»,- ասել է Անյա Լեխները։ 

Երաժշտագետները նշում են, որ Տիգրան Մանսուրյանը միշտ հավատարիմ է իր ստեղծագործական սկզբունքներին, նրա համար կարևորագույնը եղել են կոմիտասյան ավանդույթները, ազգային հիմքը, և նա կարողացել է այդ ավանդույթները շատ ինքնատիպ կերպով դրսևորել իր ստեղծագործություններում։

Նշենք, որ «Մաեստրո Մանսուրյան-80» համերգաշարը կազմակերպել է Երևանի քաղաքապետարանը՝ ՀՀ կրթության, գիտության, մշակույթի և սպորտի նախարարության աջակցությամբ։