Ձեր վստահելի աղբյուրը

«Իմ քայլը» խմբակցությունն այսօրվա նիստում քննարկել է Ամուլսարի հարցը, հնչել են կարծիքներ, ներկայացվել է առկա իրավիճակը։ Այս մասին այսօր լրագրողների հետ ճեպազրույցում ասաց ԱԺ փոխնախագահ Ալեն Սիմոնյանը։

Նրա խոսքով՝ քննարկումն անցել է համերաշխ մթնոլորտում։

«Սրություն չկար, շատ ավելի համերաշխ է անցել, լսել ենք կարծիքները: Եզրահանգում չկա, եթե  եզրահանգում լինի, հանրությունն այդ մասին կիմանա»,- ընդգծեց նա։

Հարցին՝ արդյոք Ամուլսարի հանքի շահագործման շուրջ խմբակցությունում առկա տարակարծությունները փարատվել են, Ալեն Սիմոնյանը նշեց, որ տարակարծություն չկա։

«Հիմնականում խոսքը գնում է, թե սա ինչի է այսպես, բա սրա մասին ի՞նչ եք կարծում։ Բովանդակային քննարկման ձևաչափով է եղել: Հարցը կառավարության տիրույթում է, կառավարությունը պետք է որոշում կայացնի, իսկ խմբակցությունը քաղաքական հենարանն է, որը կա և մնալու է»,- ասաց ԱԺ փոխնախագահը։

Դիտարկմանը, թե «Իմ քայլը» խմբակցությունում կան Ամուլսարի շահագործմանը կողմ և դեմ պատգամավորներ,  արդյոք այդ տարակարծությունը շարունակվում է, Ալեն Սիմոնյանը նշեց, որ հանրության մեջ էլ կան բազմաթիվ մարդիկ, որոնք դեմ են, և կան բազմաթիվ մարդիկ, որ կողմ են: Այս քննարկումներն, ըստ նրա, նրա համար են, որ լսեն մարդկանց կարծիքները և ճիշտ որոշում կայացնեն Հայաստանի համար:

«Սա աշխատանքային քննարկում է, որ պարզաբանենք, թե որ որոշումն է ամենաճիշտը։ Չի բացառվում, որ հանքն ընդհանրապես չշահագործվի, և չի բացառվում, որ հանքը սկսի շահագործվել»,- ընդգծեց Ալեն Սիմոնյանը՝  հավելելով, որ քննարկումները կարող են շարունակվել այնքան, մինչև վստահ լինեն, որ ճիշտ որոշում են կայացնում:

Ըստ նրա՝ չի կարելի վտանգի տակ դնել ինչպես բնությունն ու անվտանգությունը, այնպես էլ՝ պետության վարկանիշը։