Ձեր վստահելի աղբյուրը

Կալանավորված ՀՀ երկրորդ նախագահի աջակիցները գրեթե ամեն օր անցկացվող ակցիաների ժամանակ պահանջում են՝ դատարանը անհապաղ նիստ հրավիրել, քննության առնել նրա խափանման միջոցի հարցն ու Ռոբերտ Քոչարյանին ազատ արձակել։

Հայաստանի մարդու իրավունքների առաջին պաշտպան Լարիսա Ալավերդյանը Panorama.am-ի հետ զրույցում պնդեց, ՍԴ որոշումից առնվազն բխում է այն, ինչ պնդում են Ռոբերտ Քոչարյանի պաշտպաններն ու աջակիցները, այն է, Սահմանադրությանը հակասում են թե նրա ձերբակալումը, թե նրան անազատության մեջ պահելը։

Ալավերդյանը նկատում է, Հայաստանում չկա ոչ նորմ, ոչ էլ պրակտիկա, որով պարտադրվում է, որ ՍԴ որոշումից հետո  դատարանը պետք է անհապաղ նիստ հրավիրի ու քննություն իրականացնի։

«Ես պետք է ասեմ, որ Սահմանադրական դատարանի որոշումների իրականացումը Հայաստանում միշտ խնդրահարույց է եղել։ Մի անգամ չէ, որ բարձրացրել եմ այդ հարցը։ Ո՞վ պետք է կատարի այն, ո՞վ է պատասխանատու այն իրականացնելու համար, եթե չի կատարվում, ի՞նչ պետք է տեղի ունենա։ Ես համարել եմ ու համարում եմ, որ դա ամենախոցելի տեղն է Հայաստանում սահմանադրականության հաստատման մեջ»,-ասաց Լարիսա Ալավերդյանը։

Իրավաբանն ընդգծում է, շատ են եղել դեպքերը, երբ ՍԴ նույնիսկ ամենալավ որոշումների իրականացումը դրվում է  հարցականի տակ։

«Կրկնում եմ, որ դա պայմանավորված է սահմանադրականության չկայացմամբ։ Ես գտնում եմ, որ ճիշտ կլիներ դատարանը, դատախազությունը առանց ավելորդ ու Հայաստանը նսեմացնող մեկնաբանությունների, քայլեր ձեռնարկեն, որ ՍԴ որոշումը օրենսդրորեն իրականացվի»,-մանրամասնեց նա։

Նրա խոսքով, Հայաստանն ունի  լավ սահմանադրություն,  շատ բարձր  վարկանիշ ունեցող Սահմանդրական դատարան։

«Հնչեցվող դժգոհությունները Սահմանադրական դատարանի վերաբերյալ ես լուրջ չեմ ընդունում։ Մի քանի մարդկանց ասածը ժողովրդի կարծիք չէ»,-նշում է նա։

Նախկին ՄԻՊ-ն արձանագրում է, ՍԴ-ն որոշում է ընդունում ոչ թե կոնկրետ գործի վերաբերյալ, այլ օրենսդրական այս կամ այլ նորմի մասին։

«ՍԴ վերջին որոշումը շատ կոռկետ է, իրավական առումով իրականությունն ու ճշմարտությունն արտացոլող է։ Նշվում է, որ Սահմանդրությանը չի համապատասխանում կոնկրետ նորմը՝ այս պարագայում Քրեական դատավարության օրենսգրքի 35 հոդվածը։ Ի՞նչ պետք է հետևի դրան։ Իմ կարծիքով, որոշումն անմիջապես պետք է ընկալվի օրենսդիրի ու գործադիրի կողմից որպես ազդանշան, որ փոփոխվի այդ նորմը կամ դրա հետ հետ կապված նորմերի վերանայումը։ Այնինչ, կեղծ քաղաքականացված մեկնաբանություններ են հնչում։ Օրինակ, դատախազության հայտարարությունը կարելի էր ընդունել ամբողջովին, եթե հստակեցնենք, որ դատախազությունն էլ որպես գործադիր մարմին անելիք ունի»,-ասում է Լ. Ալավերդյանը։

Նախկին ՄԻՊ-ն առնվազն գրագետ չի համարում, որ Հայաստանի երկրորդ ննախագահին առաջադրվել է սահմանդրական կարգի տապալման մեղադրանք։

«Նախ և առաջ նման մեղադրանք կարելի էր առաջադրել նաև մյուս կողմին։ Ավելին, մյուս կողմում եղել է մի քաղաքական գործիչ՝ առաջին նախագահը, ով մինչ այդ մի անգամ արդեն տապալել է սահմանադրական կարգը 1996 թվականին։ Որևէ վստահություն ինձ մոտ չի ներշնչել ու չի ներշնչում առաջին նախագահի այն հայտարարությունը, որ իրենք են այդ ընտրություններում հաղթել։ Այն կոչերը որոնք հնչեցվել են 2008-ին, որոնք ես եմ լսել Մյասնիկյանի արձանի հարևանությամբ, այո, դրանք օրենքի ամբողջ խստությամբ պետք է դատական քննության ենթարկվեն։ Հիմա մեղավոր նշանակվել է մի կողմը, իսկ դա արդեն սխալ է։ Եվ երկրորդ, եթե մեղադրվեր նաև մյուս կողմը, ապա համոզված եմ, որ գործընթացը պետք է սկսեր տասը սպանությունների պարզաբանումով։ Եվ գործող վարչապետի այն պնդումը, թե մարտի մեկի գործն ամբողջությամբ բացահայտված է, կներեք, ոչ միայն հարցականի տակ է դնում իրավական գործընթացը, այլև հաստատում է, որ ՀՀ երկրորդ նախագահի դեմ իրականացվող այդ գործընթացը ոչ միայն քաղաքականացված է, այլ, ցավոք սրտի,  կա անձնավորված մոտեցում».-կարծիք է հայտնում Լարիսա Ալավերդյանը։

Նրա խոսքով, ՀՔԾ պետի ու ԱԱԾ տնօրենի միջև հեռախոսային խոսակցության հրապարակված գաղտանլսումն էլ փաստել է, որ այդ գործն ամբողջությամբ գտնվում է քաղաքական իշխանության վերահսկողության ներքո։

«Այն, ինչ ընթանում է այսօր, երկրի համար պատվաբեր չէ։ Այն, որ գործընթացը սկսել է քաղաքականացված ու անձնավորված մոտեցումների ներքո, խոսում է այն մասին, որ  այս գործընթացը բավականին խոցելի է, այն պահանջումէ  իրավական ճիշտ մոտեցում»,-նշում է Panorama.am-ի զրուցակիցը՝ չբացառելով, որ սա կարող է  դառնալ հարմար հնարավորություն Հայաստանի դատաիրավական համակարգի հասունացման համար։

Նա նկատում է, որ Ռոբերտ Քոչարյանի փասաբանները նոր  կամ անհայտ մարդիկ չեն այդ ոլորտում, պորֆեսիոնալ են, ունեն քաղաքացիական  խիզախություն ու ազնվություն, մյուս կողմից գործում ներառված դատավորներն ու դատախազներն էլ անգրագետ չեն, ունեն իրավական բարձր գրագիտություն։

«Հնարավոր է, որ այս պայքարի արդյունքում մենք դուրս գանք որպես իրական իրավական պետության կայացման ճանապարհին։ Ես ցանականում եմ, որ գործընթացը չդիտարկվի որպես Քոչարյանի դեմ։ Բոլորը պետք է շահագրգռված լինեն, որ գործընթացը գնա իրավական ճանապարհով, ինչին էլ ուղղված է ՍԴ որոշումը»,-ասում է նախկին ՄԻՊ-ը։

Այս պահին, Լ. Ալավերդյանի կանխատեսմամբ, դատարանը սեպտեմբերի 12-ից շուտ նիստ չի հրավիրի, իսկ խափանման միջոցը վերաբերյալ գործընթացը ձգձգվելու է ու երկարացվելու է։
«Ես համոզված եմ, որ որոշակիություն չի մտցվելու»,-նշում  է նա։