Ձեր վստահելի աղբյուրը

Շոտլանդիայի բարձրագույն դատարանի 3 դատավորներ որոշում են կայացրել, որում ասվում է, որ Մեծ Բրիտանիայի վարչապետ Բորիս Ջոնսոնի կողմից խորհրդարանի աշխատանքի դադարեցումը մի քանի շաբաթով «ապօրինի» է։ Այս մասին գրում է politico-ն։

Շուրջ 70 խորհրդարանականներ բողոքարկել էին Շոտլանդիայի բարձրագույն քաղաքացիական դատարանի դատավորի որոշման դեմ, որում Ջոնսոնի՝ խորհրդարանի աշխատանքների կասեցումը սեպտեմբերի 9-ից 14-ն ընկած ժամանակահատվածում օրենքի շրջանակներում է:

Լորդ Դոհերթին այդ ժամանակ ասել էր, որ կասեցման հարցը քաղաքական հարց է, և ոչ թե այնպիսին, որ պետք է որոշեն դատարանները, միաժամանակ նշելով, որ կառավարությունը չի խախտել որևէ օրենք:

Շոտլանդիայի Ազգային կուսակցության պատգամավոր Յոաննա Չերին թվիթերում այս որոշումը «պատմական է» անվանել։

Նշենք, որ Ջոնսոնի ընդդիմախոսները քննադատում են խորհրդարանի աշխատանքները կասեցնելու որոշումը, ասելով, որ վարչապետի նպատակն է թեկուզ առանց ԵՄ հետ համաձայնության իրականացնել Բրեքսիթ, որի վերջնաժամկետն է հոկտեմբերի 31-ը։