Ձեր վստահելի աղբյուրը

ՀՀ Ազգային ժողովն առաջին ընթերցմամբ քննարկում է «Անշարժ գույքի հարկով հարկման նպատակով անշարժ գույքի շուկայական արժեքին մոտարկված կադաստրային գնահատման կարգը սահմանելու մասին» ՀՀ օրենքի նախագիծը։

Նախագծի նպատակն է՝ անշարժ գույքի շուկայի աստիճանական զարգացման պարագայում Հայաստանի Հանրապետությունում ներդնել անշարժ գույքի միասնական գնահատման և հարկման համակարգ:

Ներկայումս շենքերի, շինությունների կադաստրային գնահատությունն իրականացվում է «Գույքահարկի մասին» ՀՀ օրենքի բաղկացուցիչ մասը կազմող հավելվածով սահմանված շենքերի, շինությունների գնահատման կարգերի համաձայն, որոնք մշակվել են 2000-2002 թվականների անշարժ գույքի շուկայի վերլուծական տվյալների հիման վրա: Իսկ հողամասերի կադաստրային գնահատությունը հարկման նպատակով իրականացվում է 1994-2002 թվականներին ընդունված ՀՀ կառավարության տարբեր որոշումներով սահմանված կարգերի համաձայն: Արդյունքում գործող կարգերով հաշվարկված շենքերի, շինությունների և հողամասերի կադաստրային արժեքները չեն արտացոլում ներկայիս անշարժ գույքի շուկայի իրական պատկերը, և դրանք խիստ տարբերվում են ներկայիս շուկայական արժեքներից:

Անշարժ գույքի կադաստրի կոմիտեի նախագահ Սարհատ Պետրոսյանն ասաց, որ  նախագծի նպատակն է պարզեցնել ընթացակարգերը, հող և գույք կամ շինություն հասկացությունները միացնել և որպես մեկ ամբողջական անշարժ գույք դիտարկել: Բացի այդ, նախատեսվում է շուկայականին մոտարկված ձևով ունենալ կադաստրային գնահատման համակարգ, որը պետք է օգտագործել և  հարկման, և օտարման դեպքերում:

Նրա խոսքով՝  արդյունքում կունենան մրցունակ և միասնական գնահատման համակարգ, կվերացվի այսօր գոյություն ունեցող կադաստրային արժեքի և շուկայական գնի միջև  գոյություն ունեցող հսկայական և անընդունելի տարբերությունը, պետական և համայանքային հողերը կօտարվեն կամ վարձակալության կտրվեն շուկայականին մոտ արժեքով: Բացի այդ, ըստ Սահրատ Պետրոսյանի, ենթադրվում է, որ փոփոխություններից հետո հարկային մուտքերը կավելանան` բարձրարժեք գույքի հարկումից։

Նա նաև նշեց, որ սա թույլ կտա ակտիվացնել պարապուրդում գտնվող արտադրական և ոչ միայն արտադրական գույքերի շրջանառությանը, քանի որ հսկայական քանակությամբ գույք չի շրջանառվում ու տնտեսական արդյունք չի ապահովում։

Նախագծում կատարվող փոփոխություններից հետո կառավարության որոշմամբ կֆիքսվեն գույքի բազային արժեքը, ինչպես նաև կադաստրային տարածագնահատման գոտիները։ Ներկայումս Հայաստանը բաժանված է 12 գոտու, փոփոխությունների արդյունքում այն կդառնա 20։

«Բացի այդ, Կառավարությունը սահմանելու է չհարկվող շեմը, դրույքաչափը, ինչպես նաև այն միջակայքը, որ դրույքաչափերի մասով կլինեն փոփոխություններ։ Նշեմ, որ այս օրենքի ընդունումը դեռևս չի նշանակում որևէ հարկի բարձրացում, ուղղակի մենք սրանով ֆիքսում ենք մի մեթոդաբանություն, որ պետությունը կարողանա շուկայականին մոտարկված չափով գնահատել անշարժ գույքը»,- ասաց Սարհատ Պետրոսյանը։