Ձեր վստահելի աղբյուրը

«Բարգավաճ Հայաստան» խմբակցությունը քննիչ հանձնաժողով ստեղծելու նախաձեռնություն է սկսել, որի նպատակն է ուսումնասիրել, թե «Լիդիան Արմենիա» ընկերության ներկայացուցիչների հայտարարած 400 մլն դոլար ներդրումը Հայաստանում որտեղ և ինչի համար է ծախսվել։

Panorama.am-ը զրուցեց ԲՀԿ պատգամավոր Արման Աբովյանի հետ՝ ճշտելու, թե գործընկերներից ովքեր են միացել իրենց նախաձեռնությանը։

«Մեր բոլոր գործընկերները տեղեկացված են գործընթացի մասին, որն ընթանում է և արդեն կորոշեն, միանու՞մ են, թե՞ ոչ։ Այս հարցը քաղաքական չէ, այս հարցն հուզում է բոլորին, քանի որ խոսքը գնում է ահռելի գումարի մասին, որը ներկայացվում է որպես ներդրում։

Նրանք դա դարձրել են մահակ, որը ֆռռացնում են պետության գլխին, ասում են՝ այդքան փող են դրել»,- ասաց Աբովյանը՝ նշելով, որ քննիչ հանձնաժողովի ստեղծման դեպքում կկարողանան ուսումնասիրել տարակուսանք առաջացնող բոլոր հարցերը։

Պատգամավորը նաև ասաց, որ հանձնաժողովի ստեղծման հետ կապված ժամանակի խնդիր չկա. «Ստեղծման ընթացքի հետ կապված առայժմ գնահատականներ չեմ տա, տեսնենք ոնց կընթանա, համենայն դեպս ուզում եմ հավատալ, որ մեր բոլոր գործընկերները հետաքրքրված են և ի վերջո ուզում են վերջ տալ այն գործընթացներին, որոնք մենք տեսնում ենք։ Սա միայն և միայն ճշմարտությունը գտնելու որոշակի միջոց է»։

«Լիդիան Արմենիա» ընկերությունը հանքարդյունաբերություն է իրականացնում Հայաստանի Հանրապետության Վայոց Ձորի մարզում` Ամուլսարի տարածքում,

2016թ.-ի՝ ընկերության ներկայացրած ՇՄԱԳ-ից հետո, որը գնահատվեց թերի և վտանգները անտեսած,  մի շարք բնապահպանական կազմակերպություններ, փորձագետներ և իրավաբաններ նամակ են հղել ՀՀ Կառավարությանը, այժմ էլ վարչապետ Նիկոլ Փաշինյանին՝ Ամուլսարի ոսկեբեր քվարցիտների հանքավայրի շահագործումը դադարեցնելու և հերթական էկոլոգիական աղետը Հայաստանում կանխելու հարցով՝ ներկայացնելով դրա իրավական և մասնագիտական հիմքերը:

Հիշեցնենք, որ օրեր առաջ վարչապետ Նիկոլ Փաշինյանը հայտարարեց, որ պահի դրությամբ իրենք չունեն Ամուլսարի հանքի շահագործումը արգելելու որևէ իրավական հիմնավորում և վճռական է թույլ տալու Լիդիանի գործունեության վերսկսկումը։