Ձեր վստահելի աղբյուրը

«Ջերմուկցիներն իրականացնում են իրենց հիմնարար իրավունքները, պաշտպանում են իրենց հիմնարար իրավունքները։ Սա նախատեսված է Սահմանադրութամբ, որ յուրաքանչյուր ոք պատրաստ է պահպանել շրջակա միջավայրը»,- լրագրողների հետ հանդիպմանն ասաց բնապահպան-իրավաբան Նազենի Վարդանյանը։

Նա նշեց, որ այն ամենը, ինչ անում են այսօր ջերմուկցիներն Ամուսլարը չշահագործելու համար, սահմանադրական պարտականություն է, որևէ մեկն իրավունք չունի խոչընդոտել նրանց իրականացնել սահմանադրական պարտականությունները։

«Ես սա ասում եմ, որ իրավապահ մարմիններն իմանան՝ եթե որևէ գործողություն ցանկանան անել,  դա կլինի, որ խոչընդոտում են մարդկանց կատարել իրենց սահմանադրական պարտականություններ, ինչը խախտում է սահմանադրական, միջազգային նորմերով նախատեսված հիմնարար իրավունքներ»,- ասաց բնապահպան-իրավաբանը։

Ն. Վարդանյանը նշեց, որ այս հարցը միայն իրավական լուծում պետք է ունենա այն էլ օրենքի գերակայության սկզբունքով։ 

«Օրենքի գերակայությունը, մարդու իրավունքների գերակայությունը սահմանված է  Սահմանադրության 3-րդ հոդվածով, որտեղ նշված է, որ հանրային  իշխանությունները պարտավոր են հարգել և պաշտպանել մարդու իրավունքներն ու իրենք սահմանափակված են մարդու իրավունքներով։ Այսինքն, այսօր ինչ որոշում կայացնեն, սահմանափակված են ջերմուկցիների  և մյուսների իրավունքներով  և չեն կարող այդ իրավունքների խախտմամբ որևէ որոշում կայացնել»,- ասաց նա։

Ասուլիսին ներկա աշխարհագրագետ, Հայկական բնապահպանական ճակատի անդամ Լևոն Գալստյանն ասաց, որ հեղափոխությունը չեն արել 15 հոգով, այլ հեղափոխությունն արել է ժողովուրդը, որի մի մասն էլ ակնկալիք է ունեցել, որ հանքարդյունաբերության ոլորտում կլինեն շատ լուրջ հեղափոխական փոփոխություններ, Խորհրդային միության ժամանակվանից շահագործվող հանքավայրերը  կբերվեն այն վիճակին, որ  դրանց վնասները գոնե կմեղվեն այն աստիճանի, որ համատեղելի կլինի մարդու կյանքի հետ։