Ձեր վստահելի աղբյուրը

«Ամուլսարի հետ կապված  մի շարք վտանգներ կան։ Խնդիրն առաջ մենակ բնապահպանական էր,  դա էր պայմանի խախտումը, որ դուրս եկավ բնապահպանականից ու մտավ իրավական դաշտ»,- ասաց «Քաղաքացու որոշում» սոցիալ-դեմոկրատական կուսակցության գործադիր մարմնի քարտուղար Սուրեն Սահակյանը, ով մասնակցում էր «Ամուլսարն առանց հանքի» նախաձեռնության քայլերթին։

Նա նշեց, որ այժմ կա իրավական բաղադրիչ, նաև քաղաքական, սոցիալական, ժողովրդավարության բաղադրիչ։

«Եթե ամբողջ Ջերմուկը կանգնում ու ասում է,  որ մենք հանք չենք ուզում, չենք ուզում հանքագործ դառնալ, ապա կառավարությունը, որը միտված է և իր գոյություն իմաստն այն է, որ ժողովրդի ցանկությունն իրականացնի, ապա ի՞նչ է անում հիմա կառավարությունը։ Կարծես, իր գործառույթին հակառակ բան է անում»,- ասաց Ս. Սահակյանը։

Նրա կարծիքով, երբ կառավարությունը հայտարարում է  պայման, որ եթե բնապահպանական ռիսկեր լինեն,  հանքը չի շահագործվելու, չլինեն անպայման կշահագործվի, պարզվում է,  որ բնապահպանական ռիսկեր կան ու հարցը մնում է քաղաքական օրակարգում, վստահության խորը ճգնաժամ կարող է առաջացնել։

Հարցին՝ արդյո՞ք կառավարությանը որևէ կաշկանդող բան կա կանխելու հանքի շահագործումը, Ս. Սահակյանն ասաց. «Վստահ եմ՝ չկա։ Կառավարությանը կա կաշկանդող հանգամանք շահագործելու համար։ Դա քաղաքացիների կամքն է»։