Ձեր վստահելի աղբյուրը

400 հազար դոլարը ծախսվել է Ամուլսարի հանքի շահագործման  վերաբերյալ  ճշմարտությունն ի  հայտ բերելու համար։ Այս մասին այսօր մամուլի ասուլիսում հայտարարեց վարչապետ Նիկոլ Փաշինյանը՝ պատասխանելով հարցին, որ Ամուլսարի հարցով «Էլարդի» փորձագետների տեսակոնֆերանսի ժամանակ, նրանք անընդհատ ասել են,  որ «Լիդիանի» փաստաթղթերն այնքան թերի են, որ հնարավոր չէ պատասխանել` հանքի շահագործումն անվտանգ կլինի, թե` ոչ, և արդյոք  դա չի նշանակում, որ փորձաքննության վրա ծախսված 400 հազար դոլարը վատնված է:

«Չեմ կարծում, որ հանուն ճշմարտության ծախսված որևէ գումար կարելի է համարել վատնված», - ընդգծեց նա։

Նիկոլ Փաշինյանն ասաց, որ սկսած առաջին օրվանից՝ կառավարությունը Ամուլսարի հանքի շուրջ ստեղծված իրավիճակում 100 տոկոս թափանցիկ է աշխատում: Նա միևնույն ժամանակ նշեց, որ «Էլարդ»-ի հետ սկայպ-կոնֆերանսի ընթացքում նաև այլ հանգամանքներ են պարզվել։

«Պարզվեց, որ  այդտեղ կա որոշակի բանավեճ, և նաև «Էլարդ»-ի  եզրակացությունը և ասածն այն էր, երբ որ ես իրենց հարց տվեցի՝ ձեր առաջարկած պայմաններում երաշխավորո՞ւմ եք անվտանգությունը՝ ասացին, որ բոլոր դեպքերում անվտանգության երաշխավորը «Լիդիան» ընկերությունն է։ Նաև ասացին, որ պետք է շինարարությունը սկսվի և մնացած հարցերը մենք կարողանանք հընթացս կարգավորել»,- ասաց վարչապետը:

Ինչ վերաբերում է Ամուլսարի ճանապարհները բացելուն, Նիկոլ Փաշինյանը նշեց, որ ունեն դատարանի որոշում ճանապարհը բացելու վերաբերյալ, իսկ Ամուլսարի հարցում պետք է մինչև վերջ գնալ ճշմարտության ետևից։

«Ճշմարտությունը ինքը պիտի մեզ բերի այս կամ այն որոշման։ Ես կարևորում եմ, որ հանրությունը մանիպուլացիաների չտրվի, այդ թվում նաև իմ կողմից հարգված ընկերների կողմից: Որովհետև, երբ որևէ քաղաքացի սարք է վերցնում, գնում մի տեղ կանգնում ու ասում է՝  ռադիացիան կչափեմ ու կպարզվի՝ ռադիացիայի այնպիսի ֆոն կա, որ հիմա Հայաստանում կոտորած է սկսվելու, ես դա համարում եմ մանիպուլացիա: Ասում եմ ճանապարհները բացեք, որովհետև ՀՀ-ում կա կառավարությունը և, եթե ճանապարհները փակելու անհրաժեշտություն լինի կփակի դրանք, եթե անհրաժեշտություն լինի կբացի: Ես չեմ ընդունում տեսակետը, որ ասում են՝ այսպես է լինելու և վերջ, ուրիշ տարբերակ չկա։ Եթե որևէ ակտիվիստ կարող է այդպես ասել, կառավարությունը չի կարող այդպես ասել: Կառավարության որոշումները պետք է բխեն օրենքից և սահմանադրությունից»,- ընդգծեց Նիկոլ Փաշինյանը։

Նրա խոսքով՝ այն մարդիկ, որոնք ասում են, թե ճշմարտությունը պարզ է, ինքը բերում է Թեղուտի օրինակը. «Այն ժամանակ, երբ Թեղուտի ամբարտակի շուրջ աղմուկ բարձրացավ, կառավարության անդամները մտել են իմ սենյակ և ասել՝  Թեղուտի հանքի շահագործումը դադարեցնելու մասին որոշում պետք է կայացնել, քանի որ պատվարը քանդվելու է և հազարավոր զոհեր կլինեն: Ես համապատասխան տեսչական մարմիններին ուղարկել եմ ստուգման, որոնք ասել են՝ տեսանելի ապագայում պատվարը չի քանդվի: Իսկ անտեսանելի ապագայում պետք  է անել փորձաքննություն: Եւ մենք պարտավորեցրել ենք շահագործողներին միջազգային փորձաքննություն իրականացնի»,- ասաց վարչապետը։

Փաշինյանը միաժամանակ նշեց՝  ինքը շահագրգռված է եղել, որ Թեղուտի հանքը բացվի, քանի որ եթե այդ վիճակում հանքն անտեր մնա, էկոլոգիական խնդրի առաջ կհայտնվի:  Բացի այդ, մարդկանց խոստացել են, որ աշխատատեղերը կվերականգնվեն:

«Եթե մեր համոզված բնապահպան գործընկների ասածը ճիշտ լիներ, երբ տարածքում երկրաշարժ  եղավ, վաղուց պետք է քանդված լիներ պատվարը, բայց դրա համար հիմա որևէ մեկը ասելո՞ւ է՝ ներողություն, ես սխալվել եմ: Ոչ մեկ չի ասելու, չէ՞, ընդհակառակը՝ պաշտպանելու են իրենց դիրքորոշումը, որ կոռումպացված է: Հեսա ասելու են, որ օրինակ՝ պուճուր աղջիկս՝ Արփին, Թեղուտում 50 տոկոս փայ է մտել, ամենավերջին լկտի ստերը կասեն, բայց չեն ասի՝ կներեք, սխալվել ենք»,- նշեց նա։