Ձեր վստահելի աղբյուրը

ԵԿՄ նախկին նախագահ, ԱԺ նախկին պատգամավոր Մանվել Գրիգորյանի  գործով ոչ թե իրականացվում է կամ իրականացվելու է արդարադատություն, այլ ուղղակի տոտալ քաղաքականություն է տարվում՝ ամեն ինչ անել, որպեսզի ի վնաս իրեն գործողություններ կատարվեն։ Լրագրողների հետ հանդիպմանն ասաց Մ. Գրիգորյանի պաշտպանական թիմի անդամ Լևոն Բաղդասարյանը։

«Մոտ 2 ամիս առաջ ստեղծվեց միջգերատեսչական հանձնաժողով՝ մեղադրողի միջնորդությամբ։ Պաշտպանական կողմը բարձրաձայնեց, որ դա տևական ժամանակ է տևելու, ասացին՝ չէ, արագ կլինի։ Հանձնաժողովը ստեղծելուց հետո Գրիգորյանին տեղափոխեցին միջգերատեսչական հանձնաժողովի կողմից հանձնարարված այն բժիշկների մոտ, որտեղ նա անցավ հետազոտություն»,- ասաց փաստաբանը։

Նրա խոսքով, բարձրաձայնեցին, որ միջգերատեսչական նախկին  հանձնաժողովի հետազոտությունների համեմատ, հիվանդությունների վատթարացում է տեղի ունենում։

«Այսքանից հետո միջգերատեսչական հանձնաժողովը որոշեց, որ ևս 2-3 փորձագետ պետք է ներգրավվի դեռևս 2-3 շաբաթ առաջ։ Այս պահին առողջապահության նախարարը մատը մատին չի խփում, որովհետև դա գտնվում է նրա տիրույթում, վերջինս իր  անգործությամբ ուղղակի հնարավորություն չի տալիս, որպեսզի այդ հանձնաժողովը աշխատի և իր գործունեությունն ավարտի։ Ահավասիկ մի դատական գործ, որտեղ ուղղակի տվյալ դրվագով երևում է առողջապահության նախարարի անգործությունը և դա չի էլ թաքցնում»,- ասաց Լ. Բաղդասարյանը։

Նա նշեց, որ  պաշտպանական կողմն արդեն 3 գրություն ուղարկել է առողջապահության նախարարին և տեղեկացրել, որ եթե Մ. Գրիգորյանի առողջական վիճակի վատթարացում տեղի ունենա, դա գտնվում է առողջապահության նախարարի տիրույթում, դրա կրողն ուղղակի համարվելու է Հայաստանի կառավարությունը։

Լ. Բաղդասարյանի խոսքով, պաշտպանական կողմը թողնելով իր պաշտպանական գործունեությունն իրականացնելը, այսօր ընկել և բարձրաձայնում է, որ կառավարության համապատասխան օղակը կոնկրետ Գրիգորյանի գործով բացարձակ ոչ մի գործողություն չի կատարում։

«Եվ իմ կարծիքով, դա հանցավոր անտարբերություն է, հանցավոր գործողություն է։ Ենթադրում եմ, որ  մինչև վարչապետ կհասնի, և վերջինս ուղղակի պարտավորություն ունի ճշտելու պաշտպանի կողմից բարձրացրած հրապարակայնորեն հարցերի իսկությունը, և եթե դրանք համապատասխանում են իրականությանը՝ ուղղակի պարտավորոթյուն ունի պատասխանատվության ենթարկելու։ Այս երկրում չպետք է ընտրովի լինի՝ ում բուժեն, ում չբուժեն»,- նշեց նա։

Լ. Բաղդասարյանն ասաց, որ անորոշ ժամանակով ձգձգվում է Գրիգորյանի գործը, նրա գործով տեղի է ունենում ընտրովի արդարադատություն, ընտրովի  ցանկությամբ գործողություններ կատարել կամ չկատարել, տեղի է ունենում անարդար գործառույթ՝ բխող բոլոր իրավական հետևանքներով։

«Պաշտպանական կողմը բան ու գործը թողել է, շաբաթը մի անգամ ասուլիս է տալիս, ասում է՝ իրավունքի խախտում կա։ Բացարձակ ոչ մի արձագանք չկա պետական լիազոր մարմնի կողմից, որ դու ճիշտ չես ասում, ստում ես։ Ես հիմա բարձրաձայնում եմ՝ անգործությամբ է զբաղված առողջապահության նախարարը Գրիգորյանի գործով։ Շաբաթներ շարունակ անգամ հրաման չի տալիս, որ ձևավորվի համապատասխան բժշկական որոշակի խումբ, որը իրականացնեն գործողություններ»,- ասաց Լ.  Բաղադասրյանը։

Նա նշեց, որ առողջապահության նախարար Արսեն Թորոսյանի հետ անձամբ չի հանդիպել, այլ ուղարկել է պաշտոնական գրություն։

«Նա այդտեղ ևս խախտել է օրենքի իմպերատիվ պահանջը, գոնե միջանկյալ պատասխան չի տվել»,- ասաց Լևոն Բաղդասարյանը։

Մանվել Գրիգորյանին մեղադրանք է առաջադրվել այն բանի համար, որ նա ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաև կատարել է տարբեր տեսակի հափշտակություններ։  Մ.Գրիգորյանը  կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել է։ Պաշտպանները  մի քանի անգամ դիմել են խափանման միջոց կալանքը գրավով փոխելու միջնորդություններով, սակայն մերժվել են։

Արդեն մի քանի ամիս Մանվել Գրիգորյանը բուժումէ  ստանում «Նաիրի» ԲԿ-ում։