Ձեր վստահելի աղբյուրը

2016 թվականից Տավուշում ստեղծվել է «Թելիկ» ապրանքանիշը։ Նախաձեռնությունը Տավուշի թեմի առաջնորդ Գերաշնորհ Տ. Բագրատ եպիսկոպոս Գալստանյանինն է։ Panorama.am-ի հետ զրուցում Տավուշի թեմի առաջնորդարանի աշխատակից Հասմիկ Մարգարյանն ասաց, որ սկզբում բացվել է գորգագործության խմբակ, այնուհետև «Կլոր սեղան» հիմնադրամի միջոցով և ֆինանսավորմամբ սկսվել է ուսուցման ծրագիր։

Նա նշեց, որ Իջևանում եղել է գորգագործության հարուստ ավանդույթներ, ցանկանում են վերականգնել այն։ Հետագայում «Ընտանիք և համայնք» ՀԿ-ի հետ համագործակցությամբ բացվել է շյուղագործության խմբակ, աստեղնագործուհի Մարիամ Ղարիբյանի  շնորհիվ սկսվել է նաև ասեղնագործության խմբակ։ «Թելիկի» սեղանի ծածկոցների, ամանի սրբիչների, քսակների վրա աստեղնագործում են հենց նրա դիզայնով։  Սկսվել են թաղիքագործության և մարաշի ասեղնագործության դասընթացները։ Մեկ տարուց ավելի  համագործակվում են ԱՄՆ ՄԶԳ-ի կողմից ֆինանսավորվող «Իմ Հայաստան» ծրագրի հետ, որն օգնում են նյութերի ձեռք բերման գործում, նաև վաճառքի հարցերում։ Իրենց միջոցով «Թելիկը» տուրիստական փաթեթ ունի, որի շրջանակում զբոսաշրջիկները կարող են վարպետության դասընթացներ անցնել կենտրոնում։

«Այս պահին մոտավորապես 15 հոգի ընդգրկված են տարբեր ծրագրերում։ Կանայք քիչ թե շատ գումար են ստանում, կապված է վաճառքի ծավալից»,- ասաց Հ. Մարգարյանը։

Գնորդները հիմնականում արտասահմանից են, նաև տեղացիներ։ Վաճառք փորձում են իրականացնել նաև Ֆեյսբուքով, ձեռագործ աշխատանքների օն-լայն խանութի միջոցով։ «Թելիկ» ապրանքանիշի սփռոցներ, անձեռոցիկներ, քսակներ՝ թեյով և առանց թեյի, գլխարկներ կան։ Կտրել են առաջին գորգը՝ Ուտիքի «Աստղահավք», դիզյանը՝ Լիդիա Մանթաշյանի, որն օգտագործել է հին դետալներ։

«Այժմ աշխատում ենք շուլալ կարպետի վրա, որը մեծ տարածում է ունեցել մեր տարածաշրջանում, հիմա շուլալով զբաղվող չկա։ Հիմա ավելի կենտրոնացած ենք շուլալի վրա։ Նախատեսել ենք շուլալով բարձրեր պատրաստել»,- ասաց նա։

Հ. Մարգարյանն ընդգծեց, որ «Թելիկը» կոչված է վերականգնելու մշակութային արժեքները, նաև հաղթահարելու սոցիալական խնդիրները։

«Սոցիալական խնդիրներն այս պահին Հայաստանում զգալի են, հատկապես երիտասարդ մայրերը, որոնք ունեն երեխաներ, աշխատանքի խնդիր ունեն։ Մեզ մոտ սկսում են հավաքվել  ժամը 11։00-11։30-ից, երբ մայրերն իրենց երեխաներին արդեն ուղարկած են լինում դպրոց։ Մեկ, մեկուկես ժամ աշխատելուց հետո գնում են տուն՝ դիմավորելու իրենց երեխաներին։ Կարող են  գործը տանել և  տանը շարունակել։ Նաև կան կանայք, որոնք տանից դուրս գալու, շփման  կարիք ունեն։ Մեզ մոտ ապահովված է շատ լավ միջավայր, կանայք իրենց լավ են զգում»,- ասաց նա։

Լուսանկարները՝ «Թելիկի» ֆեյսբուքյան էջից։