Ձեր վստահելի աղբյուրը

«Ապօրինի դատարան է»։  Երևանի ընդհանուր իրավասության դատարանի Շենգավիթի նստավայրի դիմաց հավաքված ՀՀ երկրորդ նախագահ Ռոբերտ Քոչարյանի աջակիցներն այպես գնահատեցին դատարանի որոշումը։

«Հայաստանի իրավական ոլորտի գրեթե բոլոր մասնագետները, ովքեր չեն սպասարկում իշխանության շահը, հաստատել են, որ Ռոբերտ Քոչարյանը պետք է ժամ առաջ գտնվի ազատության մեջ, քանի որ Սահմանադրական դատարանի որոշմամբ նա չի կարող ենթարկվել քաղաքական հետապնդումների, խափանման միջոց կալանավորումն առհասարակ չի կարող կիրառվել։ Պարզ է, որ Սահմանադրական դատարանի որոշման ուժով,  Հայաստանի ներպետական օրենսդրության ուժով դատարանի որոշումը բացահայատ ապօրինի է, իրավախայտառակության  հերթական դրսևորում»,- լրագրողներին ասաց Ռ. Քոչարյանի աջակիցներից փաստաբան Վահե Եփրիկյանը։

Ռ. Քոչարյանի աջակիցները նշում են, որ մեկ տարուց ավելի է Ռոբերտ Քոչարյանի նկատմամբ իրականացվում է քաղաքական հետապնդում։ Նրանք պնդում են, որ իրենք անպայման հաղթելու են, այսօր չլինի, վաղն են հաղթելու, վաղը չլինի՝ մյուս օրը։

Դատարանի դիմաց հավաքված այն քաղաքացիները, որոնք դեմ էին Ռ. Քոչարյանի ազատմանը, երթով շարժվում են դեպի Մյասնիկյանի արձան՝ տոնելու դատարանի այսօրվա որոշումը։

Հիշեցնենք, որ Ռ․ Քոչարյանի փաստաբանական թիմը միջնորդել էր անհապաղ վերացնել նախագահի խափանման միջոց կալանքը և դադարեցնել նրա նկատմամբ քրեական հետապնդումը։ Դատարանը որոշել է միջնորդությունը մերժել։