Ձեր վստահելի աղբյուրը

«Վարչապետի խոսնակը բավականին հանգամանալից անդրադարձել է պարոն Վանեցյանի հայտարարության տեքստին, ավելացնելու բան չունեմ»,- այս մասին այսօր խորհրդարանում լրագրողների հետ ճեպազրույցում ասաց «Իմ քայլը» խմբակցության պատգամավոր Արուսյակ Ջուլհակյանն՝ անդրադառնալով ԱԱԾ տնօրեն Արթուր Վանեցյանի հրաժարականին և  վերջինիս հայտարարությանը։

Ինչ վերաբերում է քաղաքական գնահատականին, պատգամավորը նշեց, որ գործ ունեն ոչ թե հրաժարականի, այլ ազատման հետ. «Նա հեռացել է, այդ հարցին անդրադարձել է նաև վարչապետն իր մամուլի ասուլիսի ժամանակ՝ պատասխանելով բոլոր հարցերին»:

Հարցին՝ իր համար հստա՞կ է, թե ինչու Արթուր Վանեցյանը պաշտոնից հեռացավ, Արուսյակ Ջուլհակյանը պատասխանեց. «Ինձ համար հստակ է, որ պարոն Վանեցյանն, ըստ էության, չի համապատասխանել այն ակնկալիքներին, որը նրա նկատմամբ ունեցել է քաղաքական մեծամասնությունը»:

«Իմ քայլը» խմբակցության պատգամավոր Սուրեն Գրիգորյանն էլ նշեց, որ գործադիր իշխանության, այս դեպքում Փաշինյան-Վանեցյան հարաբերությունների, հրաժարականին բերած նախապատվությունը չի ենթադրում, որ ամեն պատգամավոր պետք է տեղյակ լինի պատճառների մասին։

«Հիմա ասում եք, թե Վանեցյանի հայտարարության տեքստն ինչով է պայմանավորված։ Այն կարող է 100 բանով պայմանավորված լինի՝ լարված հարաբերություններով, նրանով, որ Վանեցյանը գտնում է՝  առաջնայինը երկրորդայինը տարբերելու ունակություն չունի իշխանությունը, իսկ իշխանությունը գտնում է, որ ունի։  Այսինքն՝ կարող ՝ տարրական անհամաձայնություն լինի։ Ես անկեղծ ասում եմ, որ չգիտեմ, թե ինչու է Վանեցյանն այդպես գրել, հրաժարականի և ազատմանը բերած պատճառների մասին ևս հանգամանալից չգիտեմ»:

Նա նաև նշեց, որ մի մտայնություն կա՝ քաղաքական ուժի ներսում ամեն մանրուք բոլոր 88 պատգամավորները պետք է իմանան։ Նա միաժամանակ նկատեց, որ մանրուքը ասելով նկատի ունի աշխատանքային հարաբերությունները, այլ ոչ թե ԱԱԾ տնօրենի պաշտոնը և ոչ էլ այդ պաշտոնը զբաղեցնող անձին։

Լրագրողները նորից հարցրեցին՝ արդյոք պատգամավորներին հետաքրքիր չեն հրաժարականի պատճառները,  ի վերջո չեն ցանկանում պարզել, թե ինչ տեղի ունեցավ, ինչու է նման սուր հայտարարություն անում ԱԱԾ տնօրենը, Սուրեն Գրիգորյանն արձագանքեց․«Անկեղծ, չեմ ուզում։ Ինձ համար տրված մեկնաբանությունները, բավարար են։ Եթե իմանամ կամ չիմանամ, դրանից իմ ՕԳԳ-ն չի բարձրանալու»։