Ձեր վստահելի աղբյուրը

Իրանը երկուշաբթի օրը հանդես է եկել հայտարարությամբ այն մասին, որ նախագահ Հասան Ռուհանին ՄԱԿ-ի շրջանակներում հանդիպում չի ունենալու ԱՄՆ-ի իր պաշտոնակից Դոնալդ Թրամփի հետ: Դրանից մեկ օր առաջ էր Սպիտակ տունը հայտարարել կողմերի միջև բանակցություններ սկսվելու հնարավորության մասին:

«Նման հանդիպում տեղի չի ունենա»,- ասել է Իրանի արտգործանախարարության խոսնակը: Իրանի պաշտոնատար անձինք պարբերաբար հերքել են Վաշինգտոնի հետ հանդիպում կամ բանակցություններ անցկացվելու մասին լուրերը: Նրանք դա պատճառաբանել են Իրանի նկատմամբ ամերիկյան կողմի պատժամիջոցներով, որոնք Դոնալդ Թրամփն ուժի մեջ դրեց միջուկային միջազգային պայմանագրից ԱՄՆ-ը միակողմանիորեն դուրս բերելուց հետո: Այս մասին գրում է Ամերիկայի Ձայնը։

Արգործանախարարության խոսնակ Մուսավին նաև քննադատել է 2015 թվականի միջուկային պայմանագրի կողմ հանդիսացող եվրոպական պետություններին` Ֆրանսիային, Մեծ Բրիտանիային ու Գերմանիային` «պայմանագրով ստանձնած պարտավորությունները չկատարելու համար»:
Իրանն ավելի վաղ դատապարտել է ու «անընդունելի» որակել ԱՄՆ-ի այն մեղադրանքները, որոնց համաձայն Իրանն է մեղավոր Սաուդյան Արաբիայի նավթամշակման գործարանների դեմ իրականացված հարձակման մեջ: Նման մեղադրանքներով հանդես գալուց հետո ԱՄՆ-ի նախագահ Թրամփը հայտարարել է, թե իր երկիրը պատրաստ է համապատասխան քայլերի:

Նշենք, որ հարձակումների պատասխանատվությունն իրենց վրա են վերցրել Եմենում Իրանի հետ դաշնակից հութի ցեղախմբի ապստամբները:

«Կառուցողական դիվանագիտության համար պայման է հանդիսանում պատժամիջոցների ավարտը»,- ասել է Իրանի արտգործնախարարության խոսնակն ու ավելացրել, որ Իրանը բանակցություններ է անցկացնում, երբ լինում է վստահ, որ իր ժողովրդի խնդիրները կարող են լուծվել:

«Պատժամիջոցները պետք է հանվեն, և Միացյալ Նահանգները պետք է հարգի Իրանի ժողովրդին»,- ասել է նա: