Կարծես՝ մոտ է Իսրայելի ամենաերկարակյաց վարչապետին «գահընկեց անելու» պահը. Արմեն Պետրոսյան

Քաղաքական 20:22 18/09/2019 Աշխարհում

Խորհրդարանական կառավարման համակարգի ուշագրավ առանձնահատկություններից մեկն էլ այն է, որ ոչ առաջատար դիրք զբաղեցնող կուսակցությունը կարող է ոչ միայն վճռորոշ ազդեցություն ունենալ կառավարող կոալիցիայի ձևավորման, վարչապետի ընտրության գործընթացի վրա, այլև, օրինակ, պայմանավորված տվյալ ուժի ղեկավարի քմհաճույքով, ընդհանրապես տապալել ցանկացած քաղաքական պրոցեսը: Այս մասին գրել է արաբագետ Արմեն Պետրոսյանը՝ անդրադառնալով սեպտեմբերի 17-ին Իսրայելում տեղի ունեցած ընտրությունների արդյունքներին։

«Նշվածի ամենավառ ապացույցն Իսրայելում ստեղծված իրավիճակն է: Սեպտեմբերի 17-ին կայացած արտահերթ խորհրդարանական ընտրությունների նախնական արդյունքների համաձայն՝ քաղաքական ճամբարներից որևէ մեկը չի ստացել քվեների անհրաժեշտ պարզ մեծամասնություն. խորհրդարանական մանդատների ընդհանուր հարաբերակցությունը գրեթե հավասար է՝ շուրջ 55-ական:

Ստեղծված պայմաններում և՛ ներկայում իշխող աջակողմյան կոալիցիան, և ընդդիմադիր ձախ-կենտրոնամետ ուժերը սպասում են նախկին ՊՆ, պահպանողական գաղափարական ուղղվածությամբ «Մեր տունն Իսրայելն է» կուսակցության առաջնորդ Ավիգդոր Լիբերմանի կողմնորոշմանը: Նրա կուսակցությունը 9 մանդատով 4-րդ տեղում է, և անգամ 4 մանդատով բարելավել է ս.թ. ապրիլին տեղի ունեցած ընտրությունների արդյունքները: Ի դեպ, նշված ընտրություններից հետո կառավարություն չձևավորվեց հենց նույն Լիբերմանի կոշտ և անզիջում դիրքորոշման պատճառով:

Եվ այսպիսով, կարծես՝ մոտ է իրականությանը Իսրայելի ամենաերկարակյաց վարչապետին՝ Բենյամին Նեթանյահուին «գահընկեց անելու» պահը. ի դեպ դրան ձգտում էր նաև Լիբերմանը»,-գրել է Արմեն Պետրոսյանը։

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: