Ձեր վստահելի աղբյուրը

Երևան քաղաքի առաջին ատյանի ընդհանուր իրավասության դատարանի Աջափնյակ նստավայրում ընթանում է Բարձրագույն դատական խորհրդի հանդիպումը Երևան քաղաքի առաջին ատյանի ընդհանուր իրավասության դատարանի դատավորների հետ: ԲԴԽ նախագահ Ռուբեն Վարդազարյանը հայտարարեց, որ հանդիպումը դռնբաց է, օրակարգ չկա։

«Ցանկացած փուլում Բարձրագույն դատական խորհուրդը պատրաստ է բաց քննարկել ցանկացած  հարց, պատրաստ է կանգնել ցանկացած խնդրի  թիկունքին, որի առջև կկանգնեն մեր դատավորները։
Այն քաղաքականությունը,  որը մշակվել է և ընդունվել ԲԴԽ կողմից, բացարձակ դռնբացությունն ու թափանցիկությունն է, որևէ խնդիր, հարց, պրոբլեմ չի քննարկվում դռնփակ կամ գաղտնիության ռեժիմով։ Բոլորին լսելու ենք, բոլորի ձայնը հասու է մեզ»,- ասաց ԲԴԽ նախագահը։

Խոսելով ԲԴԽ ձեռքբերումների մասին, Ռուբեն Վարդազարյանն ասաց, որ մինչև տարեվերջ փոխվելու է ողջ դատական համակարգի համակարգիչները, արդեն մրցույթ է հայտարարված։ 

Նա ասաց, որ պայմանավորվածություն ունեն և շուտով գործարկելու են՝ դատավորների սեփական մեքենաներին տրամադրվելու է դատական համակարգի պետհամարանիշներ։ Նա ընդգծեց, որ կամավոր է, ով կուզի, կփոխի։

«Մեր համոզմամբ, սա երկու հարց է լուծում։ Առաջին՝ հասարակությունը տեսնում է, որ մեքենայի ղեկին դատավոր է, վերաբերմունք է փոխվում այդ մեքենայի հանդեպ։
Դատավորները կգտնվեն հանրային հսկողության տակ. որևէ դատավոր, որը կկատարի ճանապարհային երթևեկության խախտում, կթիրախավորվի, որևէ մեքենա, որը կհայտնվի գիշերային ակումբի կամ խաղատան առջև, նույնպես կթիրախավորվի»,- ասաց Ռուբեն Վարդազարյանը։