Ձեր վստահելի աղբյուրը

ՀՀ-ում 2019-2023 թվականների ոչխարաբուծության և այծաբուծության զարգացման պետական աջակցության ծրագրով նախատեսվում է ոլորտի տնտեսվարողներին հնարավորություն ընձեռել մատչելի պայմաններով ձեռք բերել (ներկրել) մոտ 30,000 գլուխ մանր եղջերավոր կենդանիներ։

Այդ նպատակով գործադիրն այսօրվա նիստում հաստաստեց ՀՀ-ում  2019-2023 թվականների ոչխարաբուծության և այծաբուծության զարգացման պետական աջակցության ծրագիրը։

Վիճակագրական կոմիտեի կողմից հրապարակված պարենային հաշվեկշռի տվյալների համաձայն, հանրապետությունը ինքնաբավ է ոչխարի մսի գծով և այդ ցուցանիշը կազմում է 138.9 տոկոս, ինչը վկայում է այն մասին, որ ճյուղն ունի արտահանման մեծ ներուժ։

Էկոնոմիկայի նախարարի տեղակալ Ավագ Ավանեսյանը ևս փաստեց, որ 2019թ-ին  զգալիորեն աճել է ոչխարի և ոչխարի մսի արտահանումը, իսկ գինը մոտ 50 տոկոսով աճել է։ Մասնավորապես, նախորդ տարի այն եղել է 74 դոլար, իսկ այս տարվա կեսին կազմել է 101 դոլար:

Փոխնախարարն ասաց, որ ծրագրի նպատակն է` պետական աջակցության մեխանիզմների, մասնավորապես՝ մատչելի վարկավորման պայմանների կիրառման և կատարված ծախսերի փոխհատուցման միջոցով՝ հանրապետությունում ոչխարաբուծության և այծաբուծության ճյուղերի զարգացման համար նպաստավոր պայմանների ստեղծումը, բարձրարժեք տոհմային ոչխարների և այծերի ձեռք բերման (ներկրման) և բարձր մթերատու հոտերի ձևավորման խրախուսումը, բուծվող ցեղատեսակների կատարելագործումը, տոհմային գործի զարգացումը, արտադրատնտեսական արժեքավոր հատկանիշներով օժտված մաքրացեղ և տրամախաչումների միջոցով ստացված խառնացեղ կենդանիների գլխաքանակի ավելացումը, ոչխարաբուծական և այծաբուծական արտադրանքի արտադրությանև արտահանման ծավալների ավելացումը։

Ավագ Ավանեսյանը նշեց նաև, որ ծրագրի արդյունքում նախատեսվում է ձեռք բերել 30 հազար գլուխ ոչխար, իսկ գործընթացը կիրականացվի երկու մեթոդով: Առաջինով նախատեսվում է տոհմային կենդանիների ձեռք բերման նպատակով տրամադրվող վարկերի մասնակի սուբսիդավորում (12 տոկոսի դեպքում՝ 10 տոկոսը պետությունը սուբսիդավորում է, իսկ սահմանամերձ բնակավայրերի համար ամբողջությամբ է սուբսիդավորվելու): Երկրորդ տարբերակով կփոխհատուցվեն շահառուների կողմից կատարված ծախսերը, որի դեպքում   մեկ գլխի հաշվով կփոխհատուցվի մինչև 450 հազար դրամով ձեռք բերված տոհմային կենդանու համար վճարված գումարի 23 տոկոսը։

Այսպիսով, ծրագրով նախատեսվում է ավելացնել ոչխարների և այծերի գլխաքանակը։ Ծրագրի շրջանակներում ձեռք բերված բարձր տոհմային կենդանիների հաշվով մինչև 2027 թվականը կապահովվի շուրջ 100 հազ. գլուխ արտադրատնտեսական բարձր հատկանիշ¬ներով օժտված սերնդի ստացում, կավելանան ոչխարաբուծական և այծաբուծական արտադրանքի ծավալները։   2019-2027 թվականներին կարտադրվի շուրջ  3.5 մլրդ դրամ արժեքով միս և 0.5 մլրդ դրամ արժեքով կաթ, կբարձրանա ոչխարաբուծության և այծաբուծության ճյուղի շահութաբերության մակար¬դակը, պայմաններ կստեղծվեն արտահանման ծավալների ավելացման համար, հնարավորություններ կստեղծվեն հանրապետության արոտների և խոտ-հարքների առավել արդյունավետ օգտագործման համար։

Էկոնոմիկայի փոխնախարար Տիգրան Գաբրիելյանն էլ ասաց, որ նախատեսում են  ստեղծել երկու ոչխարաբուծական տնտեսություններ, որպեսզի տեղում արտադրեն ոչխարներ և չներկրեն:

Շրջակա միջավայրի նախարար Էրիկ Գրիգորյանն էլ ասաց, որ եթե սա ռազմավարական ծրագիր է, ապա պետք է նաև քննարկել՝ բնապահպանական տեսակետից գնահատման գործընթաց պետք է անցնի, թե ոչ։ «Կոնկրետ ոչխարաբուծության դեպքում այդ ռիսկը կա, որ բերում է անապատացման և դեգրադացման»,- ասաց նա։

Վարչապետ Նիկոլ Փաշինյանն էլ կատակով նշեց. «Այսինքն՝ մենք հիմա ծրագիրը հաստատում ենք, բայց ուժի մեջ չի մտնո՞ւմ: Պարզվում է՝ էլի պետք է ՇՄԱԳ անե՞նք»։