Ձեր վստահելի աղբյուրը

«Սահմանադրական դատարանը պետք է ի վերջո որոշում կայանցնի, և մեր կարծիքով այն իրավական հիմքերը, որոնք ներկայացրել են մեր իրավաբանները, բավականին ծանրակշիռ են»,- լրագրողների հետ ճեպազրույցում այս մասին ասաց «Իմ քայլը» խմբակցության պատգամավոր Լիլիթ Մակունցը՝ անդրադառնալով  ՍԴ նախագահի լիազորությունները դադարեցնելու մասին  «Իմ քայլը» խմբակցության նախագծին։

«Մենք վստահ ենք, որ ՍԴ-ն առաջնորդվելու է բացառապես իրավական հիմքերը դիտարկելով»,- նշեց Մակունցը։

Նա նշեց, որ իրավական հիմքերը կցվել են փաստաթղթին. «Այդ հիմքերին կցվել է նաև «Իմ քայլը» խմբակցության որոշումը և այն ուղղվել է ԱԺ նախագահի գրասենյակ: ԱԺ նախագահն արդեն այն մակագրել է ԱԺ պետաիրավական հանձնաժողով, որն էլ կքննարկի փաթեթը: Իրավական հիմքերն արդեն հրապարակվել են և տեղադրված են ԱԺ կայքում»:

Ինչ վերաբերում է մամուլում հրապարակված հրաժարականների մասին լուրերին՝ նա ասաց. «Անկեղծ ասած, այնքան մեծ էր այդ ցուցակը, որ մտածում էի՝ իմ անունն էլ կգտնեմ այնտեղ։ Վարչության նիստի ժամանակ որևէ բան չի քննարկվել և ինքս չունեմ որևէ տեղեկատվություն, որ գործադիրից որևէ մեկը հրաժարական է ներկայացնելու։ Ինչ վերաբերում է «Իմ քայլը» խմբակցությանը, ապա մեզ մոտ նման զարգացումներ չեն սպասվում»։