Ձեր վստահելի աղբյուրը

ՀՀ հարկային օրենսգրքում փոփոխություններ և լրացումներ կատարելու մասին օրինագծով առաջարկվում է ավելացված արժեքի հարկի վերադարձման նորմը կիրառել ԱԱՀ-ի բոլոր դեբետային (ավելացում) գումարների վրա։ Այսօր ԱԺ արտահերթ նիստում օրենքի նախագիծը ներկայացնելիս ասաց Պետական եկամուտների կոմիտեի նախագահ Դավիթ Անանյանը։

Մանրամասնելով առաջարկվող փոփոխությունները, նա ասաց. «Նախագծով առաջարկվում է բարձրացնել զրոյական դրույքաչափով հարկվող գործարքների գծով ԱԱՀ-ի դեբետային գումարների հետստացման դեպքում սահմանաչափը 20 մլն-ից մինչև 40 մլն, ինչը հնարավորություն կտա, որ պարզեցված ընթացակարգ կիրառել մինչև 40 մլն դեբետային գումարների հետ վերադարձման նկատմամբ։

Առաջարկվում է պարզեցված ընթացակարգը կիրառել նաև ԱԱՀ-ի հարկի գծով բոլոր դեբետների վերադարձմանը, այսինքն չսահմանափակվել միայն զրոյական դրույքաչափով հարկվող գործարքների դեբետներով։

Ինչպես նաև մինչև 5 մլն ԱԱՀ-ի դեբետային գումարները վերադարձեն հարկ վճարողներին՝ այս օրենքն ուժի մեջ մտնելուց հետո հաջորդող 10-րդ օրվա դրությամբ՝ առանց դիմումի և որևէ ուսումնադիրության»։

Թե ինչ են շահում սրանով՝ Անանյանն ասաց. «Հին դեբետային գումարները, որոնք որ, կարծես թե, «սառեցված» են և հետ չեն վերադարձվում, կազմում է շուրջ 56 մլրդ դրամ։ Այս պարտավարությունը շուրջ 2835 հարկ վճարողներ են, որոնցից 2571 հարկ վճարողները գործող են, նրանց ընդհանուր պարտքը կազմում է 50 մլրդ 748 մլն։ Մինչև 5 մլն պարտք ունեցողների թվաքանակը 2190 է՝ ընդհանուր գումարը 1 մլրդ 680 մլն, իսկ սրանց մեջ գործող հարկ վճարողները 1983 են՝ 1մլրդ 493 մլն ընդհանուր պարտավորության չափով։ 40 մլն դրամից ավելի պարտավորություն ունեցող հարկ վճարողների թիվն ընդամենը 202 է՝ 47մլրդ 906 մլն դրամով, որոնցից գործող են 183-ը»։

ՊԵԿ նախագահի խոսքով, եթե օրինագիծը ուժի մեջ մտնի, մինչև տարվա վերջ շուրջ 50 մլրդ գումար պետք է վերադարձնեն տնտեսությանը։

«Ստացվում է պետությունը պարտք է 56 մլրդ դրամ, դրանք այն գումարներն են, որոնք առաջացել են մինչև 2017 թվականի հուլիսի 1-ը, և պետությունն այսօր ունենալով բավարար ֆինանասական միջոցներ, նպատակ ունի վերադարձնել այդ պարտքը հարկ վճարողներին, ակնկալելով դրանք կներդնեն տնտեսության մեջ»,- հավելեց Անանյանը։