Ձեր վստահելի աղբյուրը

Սեպտեմբերի 27-ին մեծ էկրան կբարձրանա Նարինե Մկրտչյանի և Արսեն Ազատյանի «Նրա մասին կամ թե ինչպես նա չվախեցավ արջից» նոր գեղարվեստական, լիամետրաժ ֆիլմը։ Ցուցադրությունները տեղի կունենան Երևանում, Գյումրիում, Կապանում, Քաջարանում և Ստեփանակերտում։

Ֆիլմի հիմքում ռուս զինվորի (Վալերի Պերմյակով) կողմից 2015թ. Գյումրիում կատարած ոճրագործությունն է, որի զոհը դարձավ Ավետիսյանների մի ողջ ընտանիք։

Նարինե Մկրտչյանը Panorama.am-ի հետ զրույցում ասաց, որ 2015 թ. Գյումրիում տեղի ունեցած դեպքը ցնցել էր ողջ հայությանը, այն ծանրացել էր մեր հոգու վրա։

«Եթե մի բան չես կարողանում մոռանալ, խորը նստվածք է տալիս, արվեստագետի համար անհնար է այդ նյութին չանդրադառնալը։ Բայց նյութին անդրադառնալը միայն բավարար չէ, պետք է կարողանալ գեղարվեստական վերծանումը ստեղծել, որովհետև մեր խնդիրը պատմությունը պատմելը չէ, այլ գեղարվեստական պատում ստեղծելը։ Երբ մենք հասկացանք, թե ինչ դիրքորոշում ունենք և որն է մեր դիտակետն այս նյութի շուրջ, անմիջապես սկսեցինք աշխատել սցենարի վրա ու նկարահանեցինք ֆիլմը, որը տևեց երեք տարի։ Ֆիլմը ներշնչված է իրական դեպքերից, բայց իրականում այն այդ ոճրագործության հետաքննությունը չէ»,- ասաց նա։

Ն. Մկրտչյանի խոսքով, ֆիլմում օգտագործված են վավերագրական կադրեր այդ դեպքերից հետո Գյուրիում տեղի ունեցած ցույցերից, բախումներից: Արսեն Ազատյանն ասաց, որ վավերագրությունը խառնել են խաղարկայինին, հանդիսատեսի համար նույնիսկ դժվար կլինի զանազանել, թե որն է վավերագրականը, որը խաղարկայինը։

«Մենք այդ պատմության վրա հյուսել ենք մեր տարբերակը, մեր հանգուցալուծումով, մեր դիրքորշմամբ։ Տարբերակ, որն ըստ էության, կարող էր տեղի ունենալ։ Մենք այդ հանցավոր դեպքի մեր տարբերակներն ենք առաջարկել, որն ավելի շատ փիլիսոփայական հենակետ ունի։ Մենք հոգեբանական խնդիր ենք վեր հանել, գեղարվեստական պատմում է մարդկային հարաբերություններ, հոգեբանական դրամայի մասին»,- ասաց Արսեն Ազատյանը:

Ինչ վերաբերում է վերնագրին, Ա. Ազատյանը նշեց. «Խորհրդանշական իմաստ ունի։ Այն այլաբանորեն է ներկայացված։ Ֆիլմում էլ այլաբանական կերպարներ ունենք։ Իրական դաժան պատմությանը զուգահեռ, ունենք հեքիաթային գիծ, որը «Հիմար Իվանի» պատմությունն է։ Երբ ֆիլմը դիտեք, միանգամից կհասկանք զուգահեռները»։

Նշենք, որ ֆիլմի համաշխարհային պրեմիերան կայացել է 2019թ. Ռոտտերդամի 48-րդ միջազգային կինոփառատոնում։ Սեպտեմբերի 21-ին Յալթայի կինոփառատոնի ընթացքում կայանալու է ռուսաստանյան պրեմիերան։

Ն. Մկրտչյանն ասաց, որ իրենց համար կարևոր էր համաշխարհային պրեմիերան անել հենց դրսում, որպեսզի ողջ հանրությանը լսելի դառնա այդ կարևոր թեման։ Նրա ներկայացմամբ, ֆիլմի գաղափարն արժանապատվությունն է, որ ցանկացած մարդու ամենախոցելի զգացումն է՝ անկախ ազգությունից, հասարակական դիրքից։

«Նրա մասին կամ թե ինչպես նա չվախեցավ արջից» ֆիլմը մասնակիորեն ֆինանսավորվել է Հայաստանի Ազգային կինոկենտրոնի կողմից։

Նարինե Մկրտչյանը և Արսեն Ազատյանը հեղինակ են մեկ տասնյակից ավելի ֆիլմերի, որոնք մասնակցել են ավելի քան 60 միջազգային առաջնակարգ կինոփառատոնների, ինչպես՝ Բեռլինի, Ռոտտերդամի, Լոկառնոյի, Բուսանի, Մոնրեալի, Սիդնեյի, Մոսկվայի, Կալկաթայի, Գոթենբուրգի, Էդինբուրգի, Լուիզվիլի և այլ՝ ստանալով մրցանակներ և լայն արձագանք մամուլում։ Նրանք միջազգային կինոհանրությանը հայտնի են իրենց «Բոբո», «Ռադիո Երևան», «Անդրեյ», «Ճամփեզրին», «Անառակ որդու վերադարձը», «Ապակե կախազարդը» և այլ ֆիլմերով։