Ձեր վստահելի աղբյուրը

«Կարծում եմ 2018-19 թվականները պետք է Հայաստանի համար ելակետային լինեն, որպեսզի կարողանանք հասկանալ այս պահին ինչ ունենք և ինչ կարող ենք ունենալ ապագայում»,- այս մասին լրագրողների հետ զրույցում ասաց նախկին պատգամավոր, գործարար Խաչատուր Սուքիասյանը՝ անդրադառնալով տնտեսության ներկայիս իրավիճակին։

Նրա խոսքով՝ Հայաստանն ունենալու է սահուն զարգացող տնտեսություն. «Հավասար պայմանների ստեղծումը, մենաշնորհների վերացումը խթան են, որպեսզի տնտեսությունը համահունչ զարգանա»։

Ինչ վերաբերում է Ամուլսարի հանքին ու տնտեսության վրա դրա ազդեցությանը՝ նա նշեց. «Ես հանքի շահագործմանը շատ փայլուն եմ վերաբերում՝ հաշվի առնելով այն հանգամանքը, որ ես շատ եմ կարդում  և գիտեմ աշխարհում, Նոր Զելանդիայում, Ավստրալիայում, Կանադայում շատ հզոր կազմակերպություններ կան գրանցված, որոնք բնապահպանական բոլոր նորմերը կատարում են, իրենց երկրներին շատ մեծ եկամուտ են բերում։ Բնապահպանական խնդիրները պետք է թողնենք մասնագիտական ինստիտուտներին»։

Անդրադառնալով քաղաքական գործունեությամբ զբաղվելու մտադրություններին՝ Սուքիասյանն ասաց, որ այդպիսի մտադրություն չունի։

Լրագրողները նրանից հետաքրքրվեցին նաև Մարտի 1-ի գործի վերաբերյալ նրա տեսակետից, ինչին ի պատասխան ասաց. «Այդ գործը պետք է անցնի քննություն, պետք է թողնենք այն ինստիտուտներին, որոնք այսօր ձևավորվում են։ Ինձ բավարարում է դատավարության ընթացքը»։